Еңбек инспекциясының есебі тыңдалды

Былтыр облыстағы 1 652 кәсіпорын 47 538 жұмыскердің жалақысын орта есеппен 32,9 пайызға көтерген. Бұл туралы еңбек инспекциясы басқармасының басшысы Жарылқасын Айтақов айтып берді. Жарылқасын Айтақовтың айтуынша, еңбек жағдайларының ахуалын тұрақты бақылауда ұстау мақсатында аудандар мен Тараз қаласы әкімдіктерінде әлеуметтік-еңбек жағдайларын реттеу жөніндегі дағдарысқа қарсы штабтар құрылып, жұмыстар жүруде. Жыл басынан барлық деңгейде үшжақты комиссиялардың 111 отырысы өткен. – Басқарманың еңбек инспекторларымен жыл басынан бері жеке және заңды тұлғалардың арыз-шағымдары бойынша 165 тексеріс жүргізілген. Тексерістердің қорытындысымен жұмыс берушілерге орындалуы міндетті 84 нұсқама беріліп, 26 айыппұл салынған. Қабылданған шаралардың нәтижесінде есепті кезеңде анықталған жалақы қарыздары анықталып, олар бүгінгі күнге толығымен жойылып, 3 430 жұмыскердің еңбек құқықтары қорғалды, – деді басқарма басшысы. Сондай-ақ әлеуметтік-еңбек қатынастарын реттеуге бағытталған негізгі шаралардың бірі – өндірістік процесстерді тұрақтандыру, жұмыскерлерді қысқартпау мәселелері жөніндегі меморандумдардың үлесі облыста 100 пайыз қамтылған. Ал жұмыскерлердің еңбек жағдайларын жақсартуға бағытталған бүгінгі күнге облыста 10 646 ұжымдық шарт жасалған. Жиын қорытындысымен басқармаға бірқатар нақты міндеттер жүктелді.