Дәурен Абаев Жамбыл облысының тұрғындарымен кездесті

Кездесуге мәдениет, спорт, туризм саласының да мамандары қатысты. Кездесу басында Дәурен Әскербекұлы мәдениет және спорт саласына қатысты жарқын жобалар мен биылғы жылы атқарылған жұмыстар туралы баяндама жасады. Тұрғындармен кездесу барысында мәдениет саласындағы мамандар мен спорт жаттықтырушыларының жалақы мәселесі, Жамбыл облысында мәдениет мамандарын даярлайтын оқу ордасын ашу, жарақат алған спортшыларға мемлекет тарапынан көрсетілетін көмектер туралы мәселелер көтерілді. Сала мамандары мен тұрғындар көкейде жүрген сауалдарын қойып, өз ұсыныстарын ортаға салды. Дәурен Әскербекұлы мәдениет мамандарын даярлайтын жергілікті оқу орнын ашуға қатысты жауабында республикалық деңгейдегі Күләш Байсейітова атындағы дарынды балаларға арналған мектеп, Ахмет Жұбанов атындағы дарынды балаларға арналған республикалық Қазақ мамандандырылған музыка мектеп-интернаты, П.И.Чайковский атындағы Алматы музыкалық колледжі сонымен бірге Астанадағы "Шабыт" Қазақ ұлттық өнер университеттерінің бар екендігін тілге тиек етті. Егер жамбылдықтардың мәдениет мамандарын даярлайтын өңірлік оқу орнын ашуға деген сұранысы басым болса жергілікті билікпен ақылдаса келе шешемін табуға болатындығын алдыға тартты. Сондай-ақ, әуелі зерттеу жұмыстарын жүргізу артық етпейтіндігін де айтты. Сұраныс көп болған жағдайда арнайы инвесторларды тарту арқылы да мәселені шешуге болатынын айтты.