Қоғамдағы әйелдің рөлі қандай?
Қазіргі таңда қоғамдағы әйелдердің рөлі түбегейлі өзгеріске ұшырады. Бір кездері әйел адамның негізгі міндеті тек ошақ қасы, бала тәрбиесімен шектелсе, қазіргі заман талабы басқаша. Нәзікжандылар бүгінде кәсіби ортада ерлермен иық тіресе қызмет етіп, түрлі салада биік белестерді бағындырып жүр. Алайда «Мансап пен отбасыны қатар алып жүру мүмкін бе?» деген сұрақ әлі де өз өзектілігін жоғалтқан жоқ.
Бұл мәселені бірнеше қырынан қарастыруға болады. Кей сарапшылардың пікірінше, бұл мәселе жеке таңдаумен қатар, қоғамдағы көзқарас пен қолдау деңгейіне де тікелей байланысты. Қазіргі заман әйелдері тек жақсы ана болып қоймай, өз ісінің кәсіби маманы болуға да ұмтылады. Дегенмен осы екі жауапты рөлді тең ұстап, қатар алып жүру оңайға соқпайды.
Тараз қаласының тұрғыны, екі баланың анасы, жас маман Айдана Жұмабекованың айтуынша, ана болу – үлкен жауапкершілік пен үнемі таңдау жасауды талап ететін күрделі жол.
Осындай ішкі қайшылықты көптеген ана бастан кешіреді. Психологтардың пікірінше, бұл – «кінә сезімі синдромы» деп аталатын құбылыс. Яғни әйел қай рөлді таңдаса да қанағаттанбайды. Сонымен бірге жұмыс берушілердің көзқарасы да маңызды рөл атқарады. Кейбір компанияларда декреттік демалыстан кейін жұмысқа қайта оралу қиын. Ал икемді жұмыс кестесі, қашықтан жұмыс істеу мүмкіндігі бар ұйымдарда аналардың еңбекке араласуы әлдеқайда жеңіл.
Кәсіпкер Гүлмира Сәрсенбаеваның пікірінше, әйелдерге жағдай жасау – тек әлеуметтік емес, экономикалық қажеттілік.
Дегенмен бұл мәселенің екінші қыры да бар. Кейбір аналар үшін басты құндылық – бала тәрбиесі. Олар саналы түрде мансап жолынан уақытша бас тартып, отбасына басымдық береді. Бұл да – құрметке лайық таңдау. Сарапшылардың пайымдауы бойынша, бұл мәселедегі ең ұтымды шешім – алтын арқауды үзбей, тепе-теңдік сақтай білу.
Фатима САЛИЕВА,
М.Х.Дулати атындағы
Тараз университетінің 4-курс студенті