Екпеден бас тартатын ата-аналар азаймай тұр
Өңірлік коммуникациялар қызметінде облыстық санитариялық-эпидемиологиялық бақылау департаменті басшысының орынбасары Неили Муликованың қатысуымен брифинг өтті. «Туберкулез ауруының алдын алу» тақырыбында баяндама жасаған спикер қоғам денсаулығын сақтауда профилактикалық екпенің орны ерекше екенін атап өтті. Әсіресе жұқпалы аурулардың ішінде туберкулезге қарсы вакцинация – адам өмірін сақтап қалатын маңызды медициналық шаралардың бірі.
Неили Орынбасарқызының айтуынша, өңірде туберкулездің эпидемиологиялық көрсеткіштері төмендеуде. Соңғы 10 жылдың ішінде облыста туберкулезбен сырқаттанушылық 1,9 есеге, өлім-жітім көрсеткіші 3,6 есеге төмендепті.
Баяндамашының айтуынша, егер адамға туберкулез диагнозы қойылған болса, бұл ауру дер кезінде және дұрыс емделсе, толық жазылатынын есте ұстау қажет. Бақыланбаған, дұрыс емделмеген кезде туберкулез созылмалы, емделмейтін ауруға айналады.
Нұрсая САҒЫМБЕК,
М.Х.Дулати атындағы
Тараз университетінің 4-курс студенті