Жамбыл облысында жол қауіпсіздігіне жауапсыз қараған 100-ден астам шенеунік жазаланды
Бұл туралы Жамбыл облысының Полиция департаменті мәлімдеді, деп хабарлайды arainfo.kz
«Жақсы жол – жарты ырыс» екені даусыз, алайда өңірдегі жолдардың қазіргі жай-күйі әлі де жіті бақылауды қажет етеді. Жамбыл облысында жол қауіпсіздігін қамтамасыз ету мақсатында жүргізілген жүйелі жұмыстардың екі айлық қорытындысы жарияланды.
Жыл басынан бері полиция қызметкерлері 6 мың шақырымнан астам жол желісін қамтитын 706 тексеру жүргізді. Инспекция нәтижесінде 3427 түрлі ақау анықталды. Оның ішінде жол таңбаларының өшуі мен техникалық талаптарға сай келмейтін инфрақұрылым нысандары бар.
Бұл кемшіліктер бойынша жол ұйымдарына 711 нұсқама берілді. Дегенмен, «Сақтықта қорлық жоқ» деген қағиданы ұстанған тәртіп сақшылары тек нұсқама берумен шектелмей, жауапты тұлғаларды жауапкершілікке тартуға көшті.
Мәселен, өз міндетін тиісті деңгейде атқармаған 109 лауазымды тұлға әкімшілік жауапкершілікке тартылды. Ал берілген талаптарды орындауға асықпаған 10 маманға қатысты қатаң әкімшілік хаттамалар толтырылды.
Қазіргі уақытта жолдардың жай-күйі мен нұсқамалардың орындалуы тұрақты бақылауда. Себебі сапалы жол — жүргізушілер мен жаяу жүргіншілердің қауіпсіздігіне тікелей әсер ететін басты фактор.