Қынамен сурет салу да бір өнер
Қынамен сурет салу – тарихы тереңге бойлайтын, нәзіктік пен дәстүр ұштасқан ерекше өнер. Ежелгі заманнан бері бұл өнер түрі тек сәндік үшін емес, сонымен қатар түрлі тіл-көзден, жағымсыз энергиядан сақтайтын символикалық тұмар ретінде де дамып келген.
Қыз-келіншектер арасында әсемдік үшін мехенди аталып кеткен, яғни қынамен денеге сурет салу өнерінің тарихы тереңде жатыр. Бұл өнер біздің дәуірден 5 000 жыл бұрын ежелгі Египетте пайда болыпты. Кейін XII ғасырда Үндістанға тарайды. Үндістандық әйелдердің нанымынша мехенди бақыт пен қуаныш әкеледі екен. Әсіресе, тұрмыс құрғалы отырған бойжеткендер ұзатылу тойының алдында қолы мен аяғына қынамен сурет салдыруды дәстүрге айналдырған. Бұл некенің беріктігін сақтауға септігін тигізеді және тылсым күштерден қорғайды деп сенген.
Бүгінде қынамен сурет салуды хоббиына айналдырған қыз-келіншектер көп. Солардың бірі – Тараз қаласының тұрғыны Назым Дулатқызы. Назым қынамен сурет салуды мектеп кезінен бастаған.
Назеркеге әзербайжан қыздары көп келеді екен. Олар тұрмысқа шығар алдындағы қыз күнімен қоштасу кешіне аяқ-қолдарына қынамен сурет салдыратын көрінеді. Ал қазақ пен орыс қыздары әдемілік үшін «ақ қына» деп аталатын синтетикалық қынамен суретті көп салдырады екен.
Назерке салатын суреттің құны тұрақты емес, суреттің күрделілігіне қарай баға өсе береді. Мәселен, екі қолға салынған сурет үш жарым мың теңге тұруы мүмкін. Назерке қына ұзақ сақталуы үшін ыдыс-аяқты арнайы қолғап киіп жуып, уақытша моншаға бармаған жөн деп келушілеріне кеңес береді.
Сонымен қатар кейіпкеріміз мехендиді салдыру үшін арнайы шеберге барған жөн екенін ескертеді. Себебі, білмейтін маман сапасыз бояуларды қолдануы мүмкін. Ал Назеркенің өзі қынаны Үндістаннан арнайы интернет арқылы алдырады.
Сымбат ҚУАНЫШ