Әлімжеттік – әлеуметтік әлеуметтік мәселе
Қазіргі ақпараттық қоғамда бала қауіпсіздігі мен құқықтарын қорғау мәселесі күрделене түсуде. Әсіресе мектеп жасындағы балалар арасындағы буллинг пен әлеуметтік желілерде белең алған кибербуллинг – бүгінгі күннің өткір проблемаларының бірі. Осы өзекті тақырыпқа орай Ш.Уәлиханов атындағы облыстық әмбебап-ғылыми кітапханасында «Буллинг және кибербуллингтің алдын алу» тақырыбында «дөңгелек үстел» ұйымдастырылды. Іс-шараға білім беру мекемелерінің өкілдері, психологтар мен белсенді жастар қатысты.
Басқосуда кітапхана қызметкерлері кітапханалардың тек ақпарат орталығы ғана емес, сонымен қатар қоғамдағы өзекті мәселелерді талқылайтын ашық алаң екенін атап өтті.
Тараз қаласы әкімдігінің жұмыспен қамту және әлеуметтік бағдарламалар бөлімінің отбасын қолдау орталығының психологі Арайлым Болатбекқызы өз баяндамасында буллингтің жасырын және ашық түрлеріне тоқталып, балалардың мінез-құлқындағы өзгерістерді ерте байқай білу қажеттігін жеткізді. Оның пікірінше, кез келген бала агрессор да, жәбірленуші де бола алады, сондықтан профилактикалық жұмыстар үздіксіз жүргізілуі тиіс.
Ал Тараз қалалық жастар ресурстық орталығының қызметкері Құралай Бикенова онлайн ортадағы қорлау, бопсалау, жеке деректерді тарату, жалған ақпарат орналастырудың әкімшілік және қылмыстық жауапкершілігі бар екенін ескертті. Ол ата-аналарды балалардың интернеттегі әрекеттерін бақылауға шақырды.
Іс-шара барысында қатысушылар нақты өмірден алынған оқиғаларды мысалға келтіріп, олардың салдары мен алдын алу тетіктерін талқылады. Жастар әлеуметтік желілердегі жағымсыз пікірлердің психологиялық әсері туралы өз ойларын ортаға салды.
«Дөңгелек үстел» қатысушылардың пікір алмасуына, ата-ана мен мұғалімдердің бірлескен жұмысқа ынтасын арттыруға мүмкіндік берді. Кітапхана ұжымы алдағы уақытта да жасөспірімдердің қауіпсіздігі мен құқықтарын қорғауға бағытталған кездесулер мен тренингтер өткізуді жоспарлап отыр.
А.ОРЫНБАСАРҚЫЗЫ