Әр моншақта бір сыр бар
Моншақтардан зергерлік бұйымдар тоқу бұрындары қарапайым ғана хобби секілді болып көрінетін. Ал бүгінде нағыз ерекше өнерге, тіпті табысты кәсіпке айналып отыр. Біздің бүгінгі кейіпкеріміз Айнұр Кеңесқызы екінің бірінің қолынан келе бермейтін осы бір ерекше кәсіпке бет бұрып, қолөнерінің арқасында көптің алғысын алып жүр.
Айнұр Талас ауданының Ойық ауылында дүниеге келген. Қазіргі таңда Тараз қаласында тұратын кәсіпкер жолдасымен бірге 3 бала тәрбиелеп отыр.
Кәсіпкердің айтуынша, сатып алушылар моншақтан тоқылған сөмкелердің сәндік бұйым ғана емес, артында үлкен еңбек жатқан қолөнер екенін жақсы түсінеді. Айнұрдың өзі үшін де бұл кәсіп ақша табудың жолы ғана емес, жүрегіне жақын сүйікті ісі.
Айнұр моншақтарды арнайы Алматы қаласынан алдырады екен. Кәсіпкер бүгінде моншақтан жасалатын сөмке, ойыншық, әшекейлерге сұраныс артқанын, әсіресе мейрам кезінде тапсырыстардың көбейе түсетінін айтады.
Айнұр бүгінде моншақты пайдалану арқылы бұйым тоқумен айналысып қана қоймай, үйде отырып моншақ тоқу кәсібімен айналысқысы келетін қыз-келіншектерге шеберлік сабақтарын оқытады. Қазіргі таңда Айнұрдың еңбекқорлығымен тынымсыз талпынысының арқасында шәкірттері үйде отырып табыс тауып отыр.
Моншақтан бұйым тоқушылар ұлттық мәдениетімізді және рухани байлығымызды жаңғыртуда. Олар дәстүрлі өнер мен қазіргі заманның дизайнерлік эстетикасын біріктіріп, ерекше бұйымдар жасап шығарады. Елімізде қолөнер саласы шарықтап дамып келе жатқанын Айнұр сынды еңбекқор азаматшаларға қарап байқауға болады.
Сымбат ҚУАНЫШ