Қазақстан Шанхай көрмесінде рекордтық құраммен таныстырылды
Қазақстан Шанхайдағы көрмеде төрт алаңда өз көрмесін ұсынды, деп хабарлайды arainfo.kz
Шанхайда сегізінші рет өтіп жатқан CIIE халықаралық импорттық тауарлар көрмесінде Қазақстан биылғы жылы рекордтық көрсеткішпен 100-ден астам отандық өндірушімен қатысып отыр. Шараға 155 елден өкілдер мен 4100-ден астам шетелдік компания келді, кәсіби келушілер саны 449 мыңнан асты.
ҚР Сауда және интеграция министрі Арман Шаққалиевтің айтуынша, көрмеге қатысу Қазақстан үшін стратегиялық маңызға ие.
Соңғы бес жылда Қазақстан мен Қытай арасындағы өзара сауда көлемі екі есеге өсіп, 2024 жылы 30,2 млрд долларға жетті. QazTrade мәліметінше, қазақстандық компаниялар CIIE арқылы соңғы жылдары 306,5 млн доллардан асатын экспорттық келісімдер жасаған.
Қазақстан төрт платформада таныстырылуда:
- Ұлттық павильон
- China Co-Op павильоны
- Jiangsu SOHO алаңы
- Алматы қаласының жеке павильоны (биыл алғаш рет)
Көрме аясында QazTrade және Қытайдың Optimize Integration Group (OIG) компаниясы цифрлық сауданы дамытуға бағытталған меморандумға қол қойды. Құжат Қазақстан өнімдерін Қытай нарығына бірлесіп ілгерілетуге, логистика мен есеп айырысу процестерін жетілдіруге мүмкіндік береді.
OIG – Қытайдағы азық-түлік импорты саласындағы жетекші технологиялық компаниялардың бірі. Оның платформасы арқылы Қытайға әкелінетін мұздатылған өнімдердің 18% өткізіледі.
Министрдің айтуынша, Қазақстан Қытай өңірлерінде сауда платформаларын кеңейтіп келеді. Қазір Үрімжі мен Нанькин қалаларында серіктестік кеңселер жұмыс істейді.
Биыл қазақстандық өнімдерді Қытай нарығының талаптарына бейімдеуге бағытталған акселерациялық бағдарлама басталады: қаптама, брендтеу, маркетинг және сертификаттау бойынша оқыту жүргізіледі.