80 жастағы жамбылдық желаяқ Нью-Йорк марафонының чемпионы атанды
Салтанат Түйтебаев 80 жасында 42 шақырымды жүгіріп өтті, деп хабарлайды arainfo.kz
Астана халықаралық әуежайында 5 қарашаға қараған түні Нью-Йорк марафонында 80–89 жас санатында чемпион атанған мойынқұмдық Салтанат Түйтебаевты елорда жұртшылығы салтанатты түрде қарсы алды.
Жүгіруді өмір салтына айналдырған ардагер спортшыны туған-туыстары мен жақындары құшақ жая күтіп алды.
Аталған марафонда Салтанат аға 42,2 шақырымды 4 сағат 45 минут 56 секундта бағындырып, өз жас санатында бірінші орынды жеңіп алды. Бұған дейін ол 2021 жылы дәл осы марафонда 75–79 жас санатында күміс жүлдеге ие болған еді.
2025 жылғы Нью-Йорк марафонына Қазақстаннан жалпы 44 спортшы қатысты.
Ал марафондағы ең егде қатысушы — Жапониядан келген 91 жастағы Коичи Китабатаке болды. Ол қашықтықты 7 сағат 25 минут 13 секундта еңсеріп, әлемдік жұртшылықтың ерекше құрметіне ие болды.
Салтанат Түйтебаевтың жеңісі — тек Мойынқұмның ғана емес, бүкіл Қазақстан рухының, қайсарлығы мен жігерінің жарқын көрінісі.