Театр тірегіне айналған реквизитор
Қандай да бір спектакль сахналанып, сәтті шығып жатса, көрермен ыстық ықыласын, қошеметін актерларға, режиссерға білдіріп жатады. Дегенмен қойылымның сәтті шығуы бүкіл ұжымның тынымсыз еңбегінің нәтижесі екенін біріміз білсек, біріміз білмеспіз. Әсіресе әрбір қойылымға қажетті керек-жарақты әзірлеп, сахнаның сәнін кіргізетін реквизитор мамандардың еңбегін ерекше атау өтуге болады. Жуырда біз Асқар Тоқпанов атындағы облыстық қазақ драма тетрының реквизиторы Жалғат Айтуовмен тілдесіп, саф өнердің сахна сыртындағы сырларымен және сахна шымылдығы ашылғанға дейінгі қарбалас тіршілікпен танысып қайтқан едік.
Жалғат Айтуова 1962 жылы 16 желтоқсанда Жамбыл ауданы, Айша бибі ауылында дүниеге келген. 1981 жылы облыстық орыс драма театрына жұмысқа орналасып, еңбекке араласады. Осы жылы көктемде қазақ драма театрында актер болып қызмет етіп жүрген Болат Бекжановпен отау құрып, отбасылық өмірге қадам басады.
Зал ішіне еніп, көрермен орынына жайғасқаннан кейін екі көзің мен бар ойың қойылымда болатыны анық. Алайда актерлердің қолындағы заттарға аса мән бере қоймаймыз. Спектакль барысында бір зат сынса, бірі істен шығады. Енді бірі өз деңгейінде қолданылмайды. Мұндай кезде реквизитордың көңіл күйі түсіп, бойы мен ойын уайым билей бастайды екен.
Кейіпкеріміз жұмыспен қатар отбасылық өмірге де асқан жауапкершілікпен қарап, отбасы мүшелерінің арман-мақсаттарына бейжай қараған емес. Ол өмірлік серігі журналист, жазушы Болат Бекжанов жайлы да сөз қозғап, есте қалған жылы естеліктерімен бөлісті.
Театр сахнасының сыртында көзге көрінбейтін, бірақ тынымсыз қайнап жатқан жұмыс аз емес. Сол қыруар тірліктің басында әрдайым ерен еңбек иелері жүреді. Бүгінгі мақаламызда біз Жалғат Айтуова сияқты реквизитор мамандардың жауапты да күрделі қызметіне куә болып, олардың еңбегінің қаншалықты маңызды екенін сезіндік.
Мұқағали БАЛТАБАЕВ