Сарысулық өрендер сенімді ақтайды

Еліміз тәуелсіздік алған алғашқы жылдары қай салаға болсын оңай соққан жоқ. Бұрынғы одақтас мемлекеттер арасындағы байланыстар үзіліп, әр ел өзіндік даму бағдарын айқындауға тырысты. Қазақстан да «әуелі экономика, сонан соң саясат» ұстанымымен ұзақ мерзімді стратегия қабылдап, сол бағытта алға жылжыды. Рас, терең тоқырауды еңсеру өте қиын болды. Дегенмен нақты мақсаттар аясында түйткілдердің түйіні бірте-бірте тарқатыла бастады. Барлық салалармен бірге адами капиталды дамытуға, оның ішінде жастарға жан-жақты жағдай жасауға баса назар аударылды. Экономикалық дағдарыс құрсауынан толық шыға қоймаған кезеңнің өзінде халықаралық «Болашақ» бағдарламасының қабылдануы – осы сөзіміздің бір дәлелі.