Ұлттық банк банкноттар мен монеталарды сату ережесіне өзгерістер енгізді

2025 жылғы 25 тамыздағы қаулысымен Қазақстан Республикасы Ұлттық банк Басқармасы ұлттық валютаның банкноттары мен монеталарын сату және сатып алу қағидаларына бірқатар өзгерістер енгізді. Бұл түзетулер ақша белгілерінің айналымын реттеуді жетілдіріп, коллекционерлер мен инвесторлар үшін жаңа мүмкіндіктер ашады.

Қағиданың атауы жаңа редакцияда бекітілді:

«Қазақстан Республикасының Ұлттық Банкі тарапынан Қазақстан Республикасының ұлттық валютасындағы банкноттар мен монеталарды, соның ішінде арнайы қаптамадағы банкноттар мен монеталарды сату және сатып алу қағидалары».

Жаңа өзгерістерге сәйкес, «арнайы қаптама» ұғымы енгізілді. Ол банкноттар мен монеталарды зақымданудан қорғайтын арнайы қорғаныс қаптамасы ретінде қарастырылады.

Енді банкноттар мен монеталарды:

• Ұлттық банк филиалдары,
• Ұлттық банктің Орталығы,
• сондай-ақ Ұлттық банктің интернет-дүкені арқылы сатып алуға болады.

Арнайы қаптамадағы банкноттар мен монеталардың құнын Ұлттық банк директорлар кеңесі бекітеді. Баға екі бөліктен тұрады:

• номиналдық құн;
• арнайы қаптама құны.
• Бұл баға тұрақты және бекітілген болып есептеледі.
• Қосымша төлемдер
• Интернет-дүкен арқылы сатып алынған жағдайда, азаматтар мен ұйымдар жеткізу құны мен сақтандыру жарнасын қосымша төлейді.

Арнайы қаптамадағы банкноттар мен монеталар жеке және заңды тұлғалардан номиналдық құны бойынша қабылданады.

Ал инвестициялық және коллекциялық монеталарды алу үшін сатып алушы жеке куәлігін немесе цифрлық нұсқасын, қажет болған жағдайда өкілеттілікті растайтын құжатты көрсетуге міндетті. Монеталарды сатып алу үшін екі дана өтініш толтырылады: оның бірі Ұлттық банкте қалады, екіншісі сатып алушыға беріледі. Бейқұнды металдардан жасалған коллекциялық монеталар олардың номиналдық құны бойынша сатып алынады.

Монеталардың төлемге жарамдылығын Ұлттық банк қызметкерлері қолданыстағы қағидаларға сәйкес анықтайды.

Бұл өзгерістер Ұлттық банктің банкноттар мен монеталарды сату жүйесін жаңғыртып, оны ашық әрі қолжетімді етеді. Сондай-ақ коллекциялық және инвестициялық монеталарды сатып алу рәсімі жеңілдетіліп, нумизматтар мен инвесторларға жаңа мүмкіндіктер береді.