Жұмыспен қамту шаралары жанданып келеді
Жұмысшы мамандықтары жылына орай облысымызда бірқатар іс-шаралар жүзеге асырылып, жұмыспен қамту саласы қарқынды дамып келеді. Биыл жұмыспен қамтудың өңірлік картасы аясында 65 647 жаңа жұмыс орнын құру жоспарланған болатын. Есепті кезеңде оның 25 918-і іске асырылып, жалпы жоспардың 39,5 пайызы орындалып отыр.
Облыста жұмыссыздық деңгейін төмендету, халықтың табысын арттыру және кадрлар сапасын жетілдіру бағытында бірқатар жұмыстар атқарылып, жүйелі жоспарлар бекітілуде. Биыл өңір бойынша Электронды еңбек биржасы арқылы 192 жоба шеңберінде 2 732 жаңа жұмыс орнын құру көзделген. Бүгінгі күнге дейін оның 98 жобасы енгізіліп, 442 азамат тұрақты жұмысқа орналасқан.
Облыс әкімдігі жұмыспен қамтуды үйлестіру және әлеуметтік бағдарламалар басқармасының басшысы Еркін Келесовтың мәліметінше, осы жылы жұмыспен қамтудың белсенді шараларына 54 514 адамды тарту жоспарланған. Ал жыл басынан бері бұл көрсеткіштің 47 пайызы орындалып, 25 603 адам белсенді шараларға қатысқан.
Бұдан бөлек, жұмыссыз азаматтардың біліктілігін арттыру және жаңа мамандықтар бойынша оқыту шаралары жүйелі түрде жүргізілуде. Биыл облыс бойынша білім беру ұйымдары мен жұмыс берушілер базасында қысқа мерзімді кәсіптік оқыту бағдарламасына 412,7 миллион теңге бөлініп, осы қаражат есебінен 1 315 азаматты оқыту жоспарланған. Қазіргі таңда 579 адам кәсіби даярлықтан өтуге жолданған. Сонымен қатар атаулы әлеуметтік көмек алушылар саны да біртіндеп азайып, еңбек нарығына белсенді араласып келеді. Басқарма басшысының дерегінше, 2025 жылдың 1 шілдесіне дейін атаулы әлеуметтік көмек 3 408 отбасыдағы 18 705 адамға тағайындалып, жалпы сомасы 1 156,4 миллион теңге төленген. Алты айдың қорытындысы бойынша атаулы әлеуметтік көмек алушылар саны өткен жылдың сәйкес кезеңімен салыстырғанда 8 933 адамға кеміген.
Осылайша өңірімізде жұмыспен қамту шаралары қарқын алып, заңсыз әрекеттердің де жолы кесілуде. Бұл өз кезегінде халықтың еңбек әлеуетін арттырып, жаңа жұмыс орындарына көбірек азаматтардың тартылуына ықпал етуде.
Мұқағали БАЛТАБАЕВ