Тұрақтылық тұғыры биіктей берсін!
Қолданыстағы Конституцияның 1-бабының 1-тармағында «Қазақстан Республикасы өзін демократиялық, зайырлы, құқықтық және әлеуметтік мемлекет реінде орнықтырады, оның ең қымбат қазынасы – адам және адамның өмірі, құқықтары мен бостандықтары» деп жазылған. Мұндағы әрбір сөз зор маңызға ие. «Орнықтырады» деген сөз бұл процестің үздіксіздігін білдіреді. Мәселен, Қазақстанның өзін әлеуметтік мемлекет ретінде орнықтыруы, оның өз азаматтарының лайықты өмір сүруіне жағдай жасау үшін міндеттеме алатын ел ретінде дамуға ниет танытатынын білдіреді.
Бүгінде зейнетақымен қамтамасыз ету, тұрғын үй қатынастары, білім беру мен денсаулық сақтау және өзге де маңызды әлеуметтік салаларда іргелі реформалар жүзеге асып келеді. Әлемді шарпыған қаржы-экономикалық дағдарысқа қарамастан, Қазақстан бюджеттік сала қызметкерлеріне төленетін әлеуметтік төлемдер мен еңбекақыны көбейту жөніндегі барлық міндеттемелерін орындауда.
Конституцияның арқасында адамның қоғам өмірінің барлық саласындағы басымдығы қамтамасыз етіледі. Қазақстан, былайша айтқанда, адам құқықтары туралы халықаралық билльді құрайтын, барлық халықаралық шарттардың дерлік толыққанды қатысушысына айналды.
Конституция күні қарсаңында ««TALDAU» социологиялық және маркетингтік зерттеулер орталығы» Тараз қаласының 500 тұрғыны қатысқан онлайн сауалнама жүргізген еді. Жедел сауалнама үш сұрақтан құралған. Сауалнамаға қатысқандардың 46,4 пайызы ер адам, 53,6 пайызы әйел. «Қазақстан Республикасы Конституциясымен таныссыз ба?» деген сауалға респонденттердің 82,8 пайызы «Иә, таныспыз» десе, 8,6 пайызы «Жоқ, таныс емеспін», ал қалған 8,6 пайызы «Білмеймін» деп жауап берген.
«Конституцияның сізге қандай көмегі бар?» деген сауалға жауап берушілердің 41,4 пайызы әлеуметтік және құқықтық бостандық кепілі деген тұжырым жасаған. 26,2 пайызы «Мемлекет кепілдік береді» деп жауап берді. 18,8 пайызы «Халықтың бірлігін қорғайды, сақтайды» десе, 13,6 пайызы «Өмір сүруіме кепілдік береді» дейді.
«Сіз өз құқығыңызды қорғай аласыз ба?» деген сұрақ бойынша респонденттердің 31,4 пайызы өз құқығын толық қорғай алатынын білдірген. 14,8 пайызы өз құқығын қорғай алмайтынын аңғартса, 32,6 пайызы «Кейде қорғай аламын» деп жауап берген. Респонденттердің 21,2 пайызы өз құқығын қорғай алмайтынын ашық көрсеткен.
Биыл еліміздің Ата Заңына 30 жыл толып отыр. Барлық азаматты Конституция күнімен құттықтаймын. Құқықтық мемлекет ретінде іргеміз беки түсіп, халқымыздың әлеуметтік жағдайы жақсара берсін!
Бақыт Әлмұратов,
«TALDAU» социологиялық
және маркетингтік зерттеулер
орталығы» қоғамдық
бірлестігінің төрағасы