Ұлтты біріктіретін темірқазық
Конституция – мемлекеттік құрылыстың құқықтық негізін қалыптастырушы құжат. Мемлекеттің тұтастығы, саясаты, елдің әлеуметтік-экономикалық дамуы, азаматтар құқығының сақталуы, демократиялық құндылықтардың барлығы осы заңның аясына топтасқан.
Мемлекет басшысы Қасым-Жомарт Тоқаевтың Конституцияның 30 жылдығына арналған халықаралық ғылыми-практикалық конференцияда сөйлеген сөзінде де толымды дүниелер айтылды.
"Заң үстемдігін қамтамасыз ету – біздің стратегиямыздың ең маңызды қағидасы. Бұл – өркениетті және озық қоғамның басты өлшемі. Қоғамымызда заң мен тәртіп сақталмаса, ешқандай жетістік пен ілгерілеу болмайды, бұл – анық нәрсе.Заңды сыйлайтын ел қашанда берекелі болады. Сондықтан мен әр сөзімде заң мен тәртіптің маңызын ерекше атап өтіп жүрмін. Басқаша айтқанда, бұл – бізге дәстүрлі болмысымызды өзгерту қажет деген сөз. Заңды құрметтеу, тәртіпке бағыну ұлтымыздың қанына сіңіп, қасиетіне айналуы қажет. Бауыржан Момышұлының «Тәртіпсіз ел болмайды, тәртіпке бас иген құл болмайды» деген сөзі қазіргі таңда аса өзекті. Сондықтан заңды қасақана бұзатын азаматтарға, қоғамдық тәртіпке және тұрақтылыққа кері әсер ететін әрекеттерге міндетті түрде құқықтық баға беріледі. Бүкілхалықтық референдум арқылы қабылданған Ата Заңымыз – еліміздің егемендігін, бірлігін, тұтастығын және демократиялық даму жолын бекемдеген тарихи құжат", – деді Президент.
Біріншіден, жүйелік басқару құрылымына өзгерістер енгізілді. Екіншіден, Парламенттік өкілеттіктер артты. Үшіншіден, Конституциялық бақылау институты жаңғырды. Төртіншіден, өлім жазасына толық тыйым салынды. Бесіншіден, елдегі табиғи ресурстар халық меншігі ретінде қарастырылады. Алтыншыдан, «Елбасы» мәртебесі жойылды. Жетіншіден, референдум нәтижелерімен 33 бапқа барлығы 56 түзету енгізілді. Жалпы құқықтық жағынан алғанда негізгі өзгерістердің бірі – азаматтардың Конституцияда бекітілген құқықтары мен бостандықтарын тікелей қорғайтын орган – Конституциялық Сот құрылды. Уақыт талабына сай енгізілген өзгерістер мен толықтырулар елдің әлеуметтік-экономикалық дамуының даңғыл жолына түскендігін, тәуелсіз еліміздің болашағының жарқын, ұстанған бағытының кемел екендігін көрсетеді.
Конституция – тәуелсіз мемлекетіміздің тірегі, азаматтардың құқықтары мен бостандықтарының кепілі. Осы құжаттың аясында Қазақстан өзінің даму жолын айқындап, саяси тұрақтылық пен қоғамдық келісімді қамтамасыз етті. Экономикамыз нығайып, халықтың әл-ауқаты артты, халықаралық аренада беделіміз биіктеді.
30 жыл ішінде Ата Заңымыз уақыт талабына сай жаңарып, заманауи өзгерістерге бейімделіп отырды. Бұл – еліміздегі демократиялық қағидаттардың жанданып, азаматтық қоғамның қалыптасып келе жатқанының көрінісі.
Ата Заңымыз – бізді біріктіретін, ортақ мақсаттарымызға бастайтын темірқазық. Конституция күні – барша қазақстандықтар үшін ортақ мереке, ұлт болып ұйысатын күн! Мемлекетіміз мәңгі, Тәуелсіздігіміз тұғырлы, Ата Заңымыз асқақ болсын! Қазақстан Республикасының Конституциясының 30 жылдығы құтты болсын!
Арқабек ТӨЛЕБАЕВ,
облыстық қоғамдық кеңестің мүшесі