Астық қабылдау асықпай атқарылатын іс емес
Жаппай егін жинау науқаны басталған сәттен күн тәртібіне шыққан негізгі мәселенің бірі – жаңа өнімді қабылдауға бос орындардың болуы. Осыған байланысты «Азық-түлік келісімшарт корпорациясы» ұлттық компаниясы» акционерлік қоғамы негізгі астықты өңірлерде астық қабылдау пункттерін босатып, егін жинау науқанының үздіксіз жүруін қамтамасыз етуі тиіс.
Мұндай міндетті корпорацияға жедел штабтың отырысында Премьер-министрдің орынбасары – Ұлттық экономика министрі Серік Жұманғарин жүктеді.
Ауыл шаруашылығы министрлігінің мәліметінше, астық қабылдау пункттерінің қарамағында 13,3 миллион тонна орын бар, оның тек 2,2 миллион тоннасы (16%) толтырылған. Бұдан бөлек, ауылшаруашылығы тауарын өндірушілердің өздерінде 17,4 миллион тонна астық сақтау мүмкіндіктері бар.
Оңтайландыру мақсатында «Азық-түлік келісімшарт корпорациясы» астықты экспортқа және ішкі нарыққа өткізіп жатыр. 2024-2025 маркетинг жылдары рекордтық көлемдегі – 1,2 миллион тонна астық сатылды. Экспортқа күн сайын жөнелтілуде, қыркүйек айында барлық жасалған келісімшарттар бойынша астық жеткізуді аяқтау жоспарланған. Жаппай егін жинау кезеңінде «Азық-түлік келісімшарт корпорациясы» қажет болған жағдайда, астықты басқа өңірлерге тасымалдайтын болады.
Жиында астықты аймақтардың әкімдіктері жаңа өнімді кептіруге арналған арзандатылған дизель отыны мен газдың қосымша көлемін бөлу мәселесін көтерді.
Энергетика министрлігінің мәліметінше, шаруаларға литрі 228 теңгеден 402 мың тонна дизель отыны бөлінген. Дәнді кептіру үшін ауа райына байланысты тағы шамамен 79 мың тонна қажет болады.
Серік Жұманғарин өңірлерге Ауыл шаруашылығы министрлігімен бірлесіп қажетті көлемді есептеп шығарып, оны жеткізу кестесіне енгізуді, ал Энергетика министрлігіне сол отынмен қамтамасыз етуді тапсырды.
Отырыста сондай-ақ оңтүстік өңірлердегі вегетациялық кезеңнің өту барысы қаралды.
Қызылорда облысында 189,6 мың гектар егістік, оның ішінде 85,2 мың гектар күріш суармалы сумен қамтамасыз етілуде. Су жеткізуге «Қазсушар» республикалық мемлекеттік кәсіпорны және шаруа қожалықтары пайдаланатын 357 сорғы стансасы тартылған. Алматы және Жетісу облыстарында вегетация тұрақты өтуде. Жамбыл облысында 3262 гектар қант қызылшасы егістігі белгіленген кестеге сай суарылып отыр. Меркі ауданында (1822 гектар) егістіктер қазан айына дейін ішкі көздерден суарылады, Байзақ (292 гектар) және Қордай (170 гектар) аудандарында суару 20 қыркүйекке дейін ротациялық жүйе бойынша өтеді. Асы бөлімшесінде (271 гектар) бұл жұмыстарды 15 қыркүйекте аяқтау жоспарланған.
Жиын қорытындысы бойынша Премьер-министрдің орынбасары барлық өңірлерге егін жинау барысында туындайтын фермерлердің мәселелеріне жедел ден қоюды және оларды тікелей орталық мемлекеттік органдармен шешуді тапсырды.
Рrimeminister.kz