Сапалы білім – жарқын болашақ кепілі
Шерхан Мұртаза атындағы Халықаралық Тараз университетінің ректоры Махметғали Сарыбеков өңірлік коммуникациялар қызметінің алаңында брифинг өткізіп, 2025-2026 оқу жылына арналған қабылдау науқаны жайлы кеңінен баяндады.
Махметғали Нұрғалиұлы өз сөзінде оқу орнының негізгі міндеті жаңартылған білім беру талабына сай кәсіби құзырлы маман даярлау екенін айтты.
Ерекше атап өтерлігі, 2009 жылы университет жанынан халық жазушысы, белгілі қоғам және мемлекет қайраткері Шерхан Мұртазаның шығармашылығын насихаттау, ғылыми-зерттеу жұмыстарын жүргізу мақсатында «Шерхантану» ғылыми-зерттеу орталығы ашылған. Орталықта жинақталған жазушының мұрағаттық дүниелері негізінде «Қазақстанның Шерағасы» атты көптомдық жинақтың он томдығы жарық көрген. Студенттерге арналған «Шерхан Мұртаза сабақтары» ұйымдастырылып, облыстық «Шерхан Мұртаза оқулары» дәстүрлі түрде өткізіледі.
Сол секілді оқу орнының жанынан 500 орындық «Студенттер үйі» қолданысқа берілді. Салауатты өмір салтын насихаттау және профессор-оқытушылар құрамы мен студенттер арасында салауатты өмір салтын насихаттау үшін шағын футбол алаңы, баскетбол алаңы және жағажай волейболына арналған корт ашылған.
Айта кетейік, «ХТУ-дың 100 гранты» әлеуметтік жобасы бойынша білімді, талантты жастардың университетте тегін оқуына мүмкіндік бар.
Фатима САЛИЕВА,
М.Х.Дулати атындағы Тараз
университетінің 3-курс студенті