Рухани өрлеудің ұйытқысы – театр
Асқар Тоқпанов атындағы облыстық қазақ драма театры – тарих пен тағылымның, рух пен өнердің, ұрпақтар сабақтастығының шынайы символы. Бұл театр – ғасырлық болмысымызды, ұлттық рухымызды, ұлы тұлғаларымыздың бейнесін, халықтың шежірелі тағдырын сахна тілімен сөйлетіп келе жатқан ұлы мектеп. 1936 жылы құрылған сәттен бастап бүгінге дейін театр көрерменмен бірге өсіп, бірге дамып келеді.
Осы жылдар ішінде театр сахнасында ұлт рухын оятатын, тарихты тірілтетін, жүректі тербейтін жүздеген спектакль қойылып, көрермендердің жүрегінен орын алды. Қай кезеңде де театрдың басты мақсаты адам жүрегіне жол табу, ұлттық мұратты ұмыттырмау, көркем ой арқылы қоғаммен сырласу болды. Театр репертуарындағы әрбір қойылым – терең ізденіс пен жауапкершіліктің жемісі. Классикалық шығармалардан бастап, заманауи драмаларға дейінгі кең ауқымды қамтитын спектакльдер көрерменге эстетикалық ләззат сыйлап қана қоймай, ой салады, толғандырады, тәрбиелейді. Бұл – шығармашылық топтың ерен еңбегінің, жанкешті рухани ізденісінің көрінісі.
Соңғы жылдары театр халықаралық сахналарда өнер көрсетіп, қазақ мәдениетінің мәртебесін асқақтатты. Румыния, Польша, Мысыр, Қырғызстан, Татарстан, Өзбекстан секілді елдерде қойылған қойылымдарымыз тек сахналық мәдениетпен емес, сахналық ойдың тереңдігімен, ұлттық колориттің бояуымен ерекшеленді. Бұл – театрдың тек аймақтық емес, халықаралық деңгейдегі шығармашылық ұжымға айналғанының айқын дәлелі.