Алғыс арқалаған етікші
Технология қарыштап дамыған дәуірде жұмысшы мамандықтарына қызығушылық танытатындар азайып барады. Алайда мүлдем жоқ деп айтуға да болмайды. Мәселен Бақтығали Рысалиев есімді Тараз қаласының тұрғыны бала күнінен бейнеті басым жұмыстармен айналысып, еңбек жолында еріншектік танытқан кезі жоқ. Бүгінде аяқкиім жөндеумен айналысады.
Қолынан келмейтін ісі жоқ кейіпкеріміз шағын ғана дүңгіршектің ішінде тұрғындарға бірнеше қызмет түрін ұсынады. Ал басты көрсететін қызметі – аяқкиім жөндеу.
Расында кейіпкерімізге келушілердің қарасы өте көп екен. Сұхбат барысында мұны өз көзімізбен көрдік. Бірі сөмкесін тіктіруге келсе, енді бірі бұзылған техникасын жөндетуге алып келіпті.
Кейіпкеріміздің сөзінше жастар оңай табысқа, бас көтермей байлыққа жетуге ұмтылады.
Айтуынша, қазіргі жалға алып отырған орны өте шағын болғандықтан жұмыс істеу қиынға соғуда. Сондықтан әкімдік тарапынан небәрі үш метр жер берілсе дейді. Бұл жөнінде әкімдікке өтініш те қалдырыпты. Бірақ әлі күнге дейін өтінішіне жауап берілмеген.
Елге қызмет етуде еңбегін аямаған мұндай жандар қашанда құрметке лайық. Сол себепті оларға барынша қолдау көрсетілуі тиіс деп санаймыз.
М.ЖАМБЫЛҰЛЫ