Қызыл жұлдыздағы қуаныш
Тараз қаласына қарасты Әулиеата ауданындағы Қызыл жұлдыз тұрғын алқабында заманауи үлгідегі амбулатория ел игілігіне берілді. Ауыл тұрғындарына алғашқы медициналық көмекті қолжетімді етуге бағытталған денсаулық нысаны қажетті құрал-жабдықтармен толық қамтамасыз етіліп, аймақтың әлеуметтік инфрақұрылымын дамытуға үлес қосып отыр.
Тұрғын алқапта 50 келушіге арналған дәрігерлік амбулатория ашылды
Жаңа нысанның ашылуына облыс әкімі Ербол Қарашөкеев арнайы қатысып, жұртшылыққа ақжарма тілегін арнады.
Салтанатты жиында Қызыл Жұлдыз тұрғын алқабының тұрғыны, зейнеткер Тұрсынхан Нұрбаев та сөз алып, қуанышымен бөлісті.
Ал облыс әкімдігі денсаулық сақтау басқармасы басшысының міндетін атқарушы Ерік Мұсабаевтың айтуынша, Қызыл жұлдыз тұрғын алқабында 6,5 мың адам өмір сүреді.
Бір айта кетерлігі, амбулатория №7 қалалық емханаға қарайды. Аталмыш емхананың бас дәрігері Әлия Шатаеваның сөзіне сүйенсек, амбулатория соңғы медициналық үлгідегі құралдармен толық жабдықталған.
Ақтоты ЖАҢАБАЙ