Асықшыларымыз алдына жан салмады
Тараз қаласында асық атудан 2009-2011 жылдары туған жасөспірімдер арасында Қазақстан чемпионаты өтті. Бес күнге созылған байқаудың қорытындысы бойынша облыс асықшылары ел чемпионы атанды.
Чемпионатқа барлығы 18 команда қатысты. Ал облысымыздың намысын Мәди Еркен, Әсет Кеңесбек және Айбар Нұржан есімді асықшылар қорғады. Жарыс айналмалы жүйе бойынша ұпай жинау тәсілімен ұйымдастырылып, әрбір қатысушының шеберлігі мен төзімділігі сынға түсті.
Жамбылдық жампоздар барлық кезеңдерде қарсыластарынан басым түсіп, шеберліктерін танытты. «Әулие-Ата» кәсіпқой клубының спортшылары тек командалық бәсекеде ғана емес, жекелей сында да жоғары нәтиже көрсетті. Әсіресе Меркі ауданындағы №5 Ақарал жалпы орта білім беретін мектеп-гимназияның оқушысы Мәди Еркен ерекше көзге түсті. Мәди жекелей сайыста өзінің мергендігімен дараланып, 15 асықтың 8-ін небәрі 1 минут 8 секунд ішінде нысанадан дәл атып шығарып, рекордтық көрсеткіш орнатты.
Жарыс қорытындысы бойынша жамбылдық спортшылар командалық және жекелей сындарда топ жарды. Тартысты додада Түркістан облысының асықшылары екінші орынды иеленсе, үздік үштікті Алматы облысының командасы түйіндеді.
Сонымен қатар чемпионаттың жеңімпаздары Қазақстан Республикасының Ұлттық құрама командасына қабылданып, асық ату спорты бойынша спорт шеберіне үміткер атағын иеленді.
Мұқағали БАЛТАБАЕВ