Әке беделі әрқашан биік
Жуырда № 66 орта мектепте «Жақсы әкенің даналығы – балаға мың жылдық азық» тақырыбында іс-шара өтті. Ұлттық құндылықтар ұлықталған сабақты 1 «А» сыныбының жетекшісі Жадра Бахтыбаева ұйымдастырды.
Іс-шараға 1 «А» және 1 «Ә» сыныптарында оқитын ұл балалар әкелерімен бірге қатысты. Белсенділік танытқандардың қатарында Ибрагим Шукаманов пен әкесі Жаныбек Шукаманов, Олжас Асқар пен әкесі Нұрбол Тоғысбай, Али Мадиярбек пен әкесі Әуез Байдуанов, Әлібек Ғалымбекұлы мен әкесі Ғалымбек Коспакаев, сондай-ақ Жангір Молдахмет пен әкесі Ноян Молдахметов болды.
Кешті балалар «Көңілді түймелер» әнімен ашты. Сондай-ақ ашылу салтанатында мектептің тәрбие ісі жөніндегі орынбасары Ерсұлтан Нүсіпжанов сөз сөйлеп, ұрпақ тәрбиесіндегі әке рөлін әлсіретіп алмаудың маңызы зор екенін жеткізді.
Мұнан кейін кеш жүргізушісі «Жайқалған жапырақтар» әдісі арқылы әкелерді екі топқа бөлді. Әр топ ұл бала тәрбиесіне байланысты ойларын ортаға салды. Кішкентай балалалар әкелеріне деген жылы лебіздерін өлең жолдарымен жеткізді. Әкелерімен бірге балалар «Қара жорға» биін билеп, бой сергітті.
Келесі кезекте «Ұлттық құндылықтар» ойыны ойнатылып, әкелер ләңгі теуіп, асық атып, балалық шақтарына саяхат жасады.
Іс-шара соңында әкелер «Бәйтерек тілек ағашына» өз балаларына деген жылы лебіздері мен ақ тілектерін жазып, ілді.
Тағылымы мен тәлімі мол басқосу оқушылардың «Әкеге алғыс!» әнімен аяқталды.
Әлия ЖАНӘБІЛ,
М.Х.Дулати атындағы Тараз
универститетінің 4-курс студенті