Еріктілер елді ойлайды
№9 Меркі колледжі бәсекеге қабілетті мамандар даярлау жөніндегі Мемлекет басшысының тапсырмасын орындауға айрықша назар аударуда. Оқу орнының ұстаздары кәсіби шеберлік дағдыларын дамытуды өздерінің негізгі мақсаты деп санайды. Сондықтан болар студенттер арасында шеберлік байқауларын жиі өткізіп тұрады. Мәселен, өткен жылдың қазан айында оқу орнында ауылшаруашылығы өндірісіндегі тракторист-машинист біліктілігі бойынша халықаралық кәсіби шеберлік байқауы өтті.
Сайысқа республикамыздың әр өңірінен және көрші жатқан Қырғыз және Өзбекстан Республикаларынан да жұмысшы болуға ынтасы бар болашақ кәсіп иелері қатысып, бағын сынады. Байқау колледждің оқу-тәжірибе учаскесінде, тікелей егістік басында өтті. Болашақ мамандар 5 модуль бойынша сынға түсті. Байқауға қатысушылар алдымен «Joһn Deere – 550» комбайнының жұмыс барысындағы және жолда жүру қалыптары бойынша алған теориялық білімдерін практика жүзінде көрсетіп берді. Байқауда жан-жақтылығымен көзге түскен Нұрболат Баймахан жеңімпаз атанды.
Жуырда облыс прокуроры Нұрғалым Әбдіров колледжге арнайы келіп, студенттермен кездесті. Басқосуға облыстық әділет департаментінің басшысы, жергілікті атқарушы органдардың өкілдері, сондай-ақ колледж директорлары қатысты. Нұрғалым Мәжитұлы сонда механизация бөлімінің шеберлері мен тәлімгерлерінің өз қолымен жинаған шағын тракторын да көрген болатын.
Иә, өндірістік оқу шеберлері Ә.Рақаеваның, Т.Төлендиев пен Б.Спанзалиевтің болашақ жұмысшыларға үйретері көп. Олар студенттерден волентерлық топ құрып, Наурыз мейрамы қарсаңында қарт адамдарға қолғабыс тигізіп, олардың ауласын тазалап, жерін аударып, қолғабыс тигізгенін де айту ләзім. Осынау игілікті іс-шарада колледждің механизация және фермерлік бөлімінің студенттері Ринат Қадыровтың, Ермахан Темірлан мен Бүркіт Елубайдың, Бейбарыс Саламат пен Ерасыл Қаныбектің, Бейбарыс Базарқұл мен Сержан Болысбектің, Нұрасыл Әуез бен Әзиз Шариповтың, олардың жетекшілері Тоқтағұл Төлендиев пен Бекзат Спанзалиевтің ерекше белсенділік танытқанын атап өткен жөн.
Сейсен ҚОЖЕКЕ,
журналист
Меркі ауданы