Болашақ фельдшерлер әскери госпитальда тәжірибеден өтуде
Тараз қаласындағы әскери госпитальда болашақ медицина саласының мамандары үшін маңызды бастама қолға алынды. Анығын айтқанда, Жамбыл жоғары медициналық колледжінің студенттері госпитальда тәжірибеден өтіп, кәсіби дағдыларын жетілдіруге мүмкіндік алды.
Госпиталь бастығы, медицина қызметінің подполковнигі Рафик Гусейновтің айтуынша, мұндай тәжірибе студенттер үшін өте пайдалы.
Госпитальда болашақ фельдшерлер науқастарды емдеудің түрлі әдістерін меңгеріп қана қоймай, нақты жұмыс барысында пайда болатын қиындықтармен де бетпе-бет келеді. Бұл олардың кәсіби тұрғыда өсуіне, тез шешім қабылдау қабілетін дамытуына септігін тигізеді.
Тәжірибе барысында студенттер госпиталь мамандарымен бірге науқастарды тексеріп, емдеу жоспарын талқылайды. Мәселен, госпитальдың хирургиялық бөлімінің бастығы, медицина қызметінің майоры Бегәлі Тілеген студенттермен бірге күн сайын таңғы тексерулерге шығып, әртүрлі клиникалық жағдайларды бірге қарастырады. Ол өз тәжірибесімен бөлісіп, қандай әдістер мен емдеу тәсілдерін қолдану керектігін нақты мысалдар арқылы түсіндіреді.
Госпитальдың терапиялық бөлімінің бастығы, медицина қызметінің подполковнигі Бахромжан Тәжібаев пен медицина қызметінің майоры Абдилла Сәуленбеков те студенттердің білімін шыңдауға белсенді атсалысуда.
Студенттердің айтуынша, әскери госпитальдағы тәжірибе олардың медициналық білімін тереңдетуге және тәжірибелік дағдыларын жетілдіруге көмектесуде.
Мүмкін, болашақта дәл осы студенттер әскери дәрігер атанып, үлкен жетістіктерге жетер. Әзірге олар алған білімдері мен дағдыларын шыңдап, болашақ мамандықтарының қыр-сырын меңгеруге бар күш-жігерлерін салуда.
Ақтоты ЖАҢАБАЙ