Елімізде жасөспірімдер арасындағы қылмыс деңгейі үш есеге төмендеді
Соңғы 10 жылда Қазақстанда жасөспірімдер қылмысы үш есеге төмендеді,деп хабарлайды arainfo.kz
ҚР Оқу-ағарту министрлігінде Кәмелетке толмағандардың істері және олардың құқықтарын қорғау жөніндегі ведомствоаралық комиссияның 2025 жылғы алғашқы отырысы өтті. Оған орталық мемлекеттік және жергілікті атқарушы органдардың, үкіметтік емес ұйымдардың өкілдері қатысты.
Жиында кәмелетке толмағандар арасындағы құқықбұзушылықтардың, қадағалаусыз және панасыз қалудың алдын алу, сондай-ақ балалардың қауіпсіздігі мен әл-ауқатын қамтамасыз етуге бағытталған жүйелі шаралар талқыланды.
Ресми статистикаға сәйкес, соңғы 10 жылда елдегі жасөспірімдер қылмысының деңгейі үш есеге төмендеген. Құқықбұзушылықтарды анықтау және тіркеу көрсеткішінің өсуіне қарамастан, 2024 жылдың қорытындысы бойынша олардың саны қосымша 5%-ға азайған. Дегенмен, Жетісу, Ұлытау, Павлодар, Ақмола, Қарағанды облыстарында, сондай-ақ Астана және Шымкент қалаларында әлі де нақты және мақсатты шешімдерді қажет ететін мәселелер бар.
Ішкі істер министрлігінің өкілі елімізде кәмелетке толмағандар арасындағы құқықбұзушылықтардың алдын алу бойынша кешенді жұмыстар жүргізіліп жатқанын атап өтті. Алайда, әлеуметтік ортаның қарқынды өзгеруі бұл үдерісте мемлекеттік органдардан бастап ата-аналарға дейінгі барлық тараптардың белсенді қатысуын талап етеді. Бұл тәсіл ҚР Оқу-ағарту министрлігіне қарасты Балалардың құқықтарын қорғау комитетінің талдамалық материалдарында да көрініс тапқан.
Комиссия отырысында ағымдағы жағдай, жасөспірімдер арасындағы құқыққа қарсы мінез-құлықтың негізгі себептері егжей-тегжейлі зерделеніп, оларды әлеуметтендіру және алдын алу бойынша практикалық қадамдар ұсынылды.
Отырысты қорытындылай келе, ҚР Оқу-ағарту министрі Ғани Бейсембаев жергілікті атқарушы органдарға алдын алу шараларын күшейтіп, жұмысты жүйелі түрде жүргізуді тапсырды. Ол құқықтық ағартуға, тәрбиелік жұмыстарға және оқушылардың бос уақытын тиімді ұйымдастыруға ерекше назар аудару қажеттігін атап өтті. Сондай-ақ, мектептердегі ата-аналарды педагогикалық қолдау орталықтарының және аймақтық психологиялық қызметтердің жұмысын жандандыруға басымдық берілді.