Жасанды интеллект дәріс өтеді
Жасанды интеллект пен ақпараттық технологиялар медицина, экология және басқа да әлеуметтік салаларда кеңінен қолданылуда. Білім саласы да бұл тізімнен тыс қалмайды. Нейрожелілер мұғалімдер мен оқытушылардың жүктемесін жеңілдетіп, жаңа кәсіптерді меңгеруді жеңілдетуге көмектеседі.
Жақында Жамбыл инновациялық жоғары колледжі студенттерінің қатысуымен семинар өтіп, осы тақырып кеңінен талқыланды. Іс-шараны «Astana Hub» технопаркінің өңірлік филиалы – «Zhambyl Hub» ұйымдастырды. Жиынды ҚР Бас прокуратурасы басқармасының IT-заңгері Данияр Шадыханов жүргізді. Спикер студенттерге жасанды интеллекттің оқыту процесіндегі рөлін түсіндірді.
Жасанды интеллекттің тағы бір артықшылығы – шығармашылық қабілеттер мен сыни ойлауды дамытуы. Оқу материалдарына қолжетімділікті кеңейтіп, оқушылардың қызығушылығын арттырады. Сонымен қатар онлайн білім беру платформалары мен қосымшалары шалғай аймақтарда немесе мүмкіндігі шектеулі жандар үшін білім алу мүмкіндігін кеңейтеді.
Алайда «Zhambyl Hub» менеджері Нұржан Сағындық жасанды интеллект тек көмекші құрал екенін ұмытпау қажеттігін еске салды.
Білім алу мүмкіндіктері тұрғысынан да жасанды интеллекттің болашағы зор. Мысалы, жасанды интеллект алгоритмдері студенттің деңгейін анықтап, жекелендірілген оқу жоспарын жасай алады. Бұл тәсіл «Duolingo» секілді тіл үйрету қосымшаларында кеңінен қолданылады. Осылайша кездесуде білімгерлерге жасанды интеллекттің артықшылығы жайлы егжей-тегжейлі айтылды.
Ақтоты ЖАҢАБАЙ