NIS Қытайдың жетекші университетімен меморандумға қол қойды
«Назарбаев Зияткерлік мектептері» дербес білім беру ұйымы халықаралық ынтымақтастығын кеңейтіп, жаңа серіктестіктер орнатуда. Жуырда Азиядағы жетекші жоғары оқу орындарының бірі – Шэньчжэнь қаласындағы Гонконг Қытай университетімен (CUHK-Shenzhen) әріптестік байланыс орнатылды. Бұл келісім оқушылардың білім алу мүмкіндіктерін кеңейтіп, жаңа көкжиектерді бағындыруға жол ашады.
Ынтымақтастық туралы меморандумға NIS Басқарма Төрағасының орынбасары Сабыржан Сәдуақасов пен CUHK-Shenzhen университетінің академиялық байланыстар кеңсесінің директоры Пол Ке қол қойды.
Бұл келісім зияткерлік мектептердің шәкірттеріне әлемдік білім беру кеңістігін кеңейтіп, жаһандық академиялық қауымдастықпен тығыз байланыс орнатуға мүмкіндік береді. Заманауи оқыту әдістерімен танысу, халықаралық академиялық алмасу бағдарламаларына қатысу, ғылыми-зерттеу жобаларында тәжірибе жинақтау – NIS түлектеріне ашылған жаңа көкжиектердің бір парасы ғана.
Ең маңыздысы – CUHK-Shenzhen университеті NIS түлектеріне екі толық бакалавриат шәкіртақысын тағайындайды.
Зияткерлік мектептердің бірегей NIS-Programme білім беру бағдарламасын әлемнің бірқатар беделді университеттері ресми түрде мойындаған. Қазіргі таңда NIS түлектерінің дипломдарын Қазақстандағы 24 және шетелдегі 69 жоғары оқу орны қабылдайды. Бұл түлектерге әлемдік деңгейдегі үздік оқу орындарына түсуге кең мүмкіндік береді.
CUHK-Shenzhen университетімен арада орнатылған әріптестік NIS-тің халықаралық деңгейдегі беделін арттырып, түлектерге сапалы білім алуға даңғыл жол ашады. Қазіргі заманғы цифрландыру мен жасанды интеллект дамыған кезеңде бұл келісімнің маңызы зор.
Шэньчжэнь қаласындағы Гонконг Қытай университеті әлемдік білім беру кеңістігінде айрықша орын алады. Оның беделін бірнеше факторлар айқындайды. Мысалы «QS World University Rankings – 2025» жаһандық рейтингінде 36-орынды иеленген. Кампустары Шэньчжэнь және Гонконг қалаларында орналасқан. Оқыту үдерісі халықаралық білім беру стандарттарына сай ағылшын тілінде жүргізіледі.
NIS өкілдері сапар барысында CUHK-Shenzhen университетінің академиялық бағдарламаларымен, студенттерді қолдау жүйесімен және халықаралық алмасу мүмкіндіктерімен жан-жақты танысты. Сонымен қатар, университетте білім алып жатқан NIS түлектерімен кездесу ұйымдастырылып, олар оқу тәжірибелерімен бөлісті.
Кездесу барысында цифрландыру дәуірінде білім берудің болашағы, жасанды интеллектінің оқу үдерісіне ықпалы және жаһандану жағдайында академиялық серіктестіктің рөлі ерекше талқыланды.
Тараз қаласындағы Назарбаев зияткерлік мектебінің баспасөз хатшысы Аружан Меркібай бұл келісімнің маңыздылығына тоқталды.
Ақтоты ЖАҢАБАЙ