Қадір түні 270 отбасыға көмек көрсетілді
Рамазан айының ең қасиетті әрі сауапқа толы кезеңдерінің бірі – Қадір түні. Бұл түннің мың айдан да қайырлы екені қасиетті Құранда айтылған. Облысымызда осы ұлық түнге орай үлкен қайырымдылық іс-шарасы ұйымдастырылып, көптеген мұқтаж отбасыға көмек көрсетілді. Облыстық «Һибатулла Тарази» мешітінде Қазақстан мұсылмандары діни басқармасының облыс бойынша өкілдігінің ұйытқы болуымен, жомарт азаматтардың демеушілігімен «Шарапаты мол Қадір түні» атты қайырымдылық науқаны өтті. Осы сауапты істің аясында әлеуметтік тұрғыдан аз қамтылған 270 отбасыға азық-түлік себеті үлестірілді.
Қадір түні – Жаратушы Иеміздің ерекше мейірімі мен шапағаты төгілетін, жасалған әрбір ізгі амалдың сансыз сауапқа кенелтетін сәті. Бұл түнде мүміндер шынайы ықыласпен дұға жасап, кешірім тілеп, ізгі істерге ұмтылады. Сол себепті де мұндай мейірімділікке бастайтын іс-шаралардың қасиетті түнде ұйымдастырылуының маңызы зор.
Қайырымдылық іс-шарасына жиналған жамағатқа Қазақстан мұсылмандары діни басқармасының облыс бойынша бас имамы Асқар Зәкіржанұлы Рамазан айының құндылығы мен Қадір түнінің ерекшелігі жайында тағылымды насихат айтып, жиналған көпшілікті ұлық мерекемен құттықтады.
Сондай-ақ, Қазақстан мұсылмандары діни басқармасының облыстағы «Зекет» қорының өкілі әрі Тараз қаласының бас имамы Ержан Аманбаев та көпшілікке ізгі тілегін жеткізді. Ол қайырымдылықтың қоғам үшін маңыздылығын атап өтіп, көмекке мұқтаж жандарға жәрдемдесу әрбір мұсылманның міндеті екенін айтты.
Іс-шара аясында көпбалалы, мүмкіндігі шектеулі жандар, жалғызбасты аналар, әлеуметтік аз қамтылған отбасыларға азық-түлік себеттері үлестірілді. Әрбір отбасыға күнделікті тұрмысқа қажетті келесі тағам өнімдері берілді. Олардың ішінде 5 келі ұн, 2 келі макарон, 2 келі күріш, 2 келі қарақұмық, 2 келі қант, 200 грамм шай, 2 литр күнбағыс майы, 3 келі картоп, 3 келі пияз, 1 келі тәттілер (конфет, печенье) бар. Бұл азық-түлік жиынтығы мұқтаж жандар үшін үлкен көмек болып, олардың қасиетті айды жақсы көңіл күймен өткізуіне септігін тигізді.
Қайырымдылық – қоғамдағы ең игі істердің бірі. Мұндай сауапты амалдар халықтың бірлігін нығайтып, мұқтаж жандардың еңсесін көтеруге көмектеседі. Қайырымды жандардың демеушілігімен жүзеге асқан бұл іс-шара көптеген отбасының жүрегіне жылулық ұялатты.
Іс-шара барысында қайырымдылық себеттерін алған жандар өз алғыстарын білдіріп, ұйымдастырушыларға шынайы ризашылықтарын жеткізді.
«Һибатулла Тарази» мешіті жыл сайын мұқтаж жандарға қолдау көрсетуді дәстүрге айналдырған. Бұл мешіттің ұйымдастыруымен бұған дейін де «Рамазан – мейірімділік айы», «Жылулық сыйла» сынды түрлі қайырымдылық іс-шаралары өтіп, әлеуметтік аз қамтылған отбасыларға азық-түлік, киім-кешек, қаржылай көмектер көрсетілген болатын.
Алдағы уақытта да осындай игі іс-шаралар жалғасын тауып, көмекке мұқтаж жандарға жәрдем беру үрдісі үзілмейді. Бұл қайырымдылық акциясы тек бір реттік іс-шара ғана емес, қоғамда мейірімділік пен жанашырлықты арттыруға бағытталған ұзақ мерзімді бастама.
Қадір түні – адам баласы үшін ерекше мүмкіндік. Бұл түні шын жүректен жасалған әрбір дұға, әрбір қайырымды іс үлкен сауапқа ие болады. Осы орайда, ұйымдастырушылар барша мұсылман қауымын Қадір түнін құлшылықпен өткізуге, өзара мейірімділік пен жанашырлық танытуға шақырды.
Осындай іс-шаралардың көптеп ұйымдастырылуы қоғамдағы ізгілік пен мейірімнің артуына ықпал етеді. Жақсылық жасаушылар қатары көбейіп, қайырымдылыққа үлес қосушылардың саны арта берсе, бұл еліміздің игілігі үшін де үлкен пайда әкелмек.
Алла Тағала осы игі іске атсалысқан барлық жандардың жасаған қайырымдылығын қабыл етіп, мол сауаптан жазсын! Қасиетті Қадір түні барша мұсылман қауымына берекесімен келсін!
Айжан ӨЗБЕКОВА
