1 жылда 280 медаль иеленді
Өңірлік коммуникациялар қызметінде Жоғарғы спорт шеберлігі мектебі директорының орынбасары Рахман Тастековтің қатысуымен баспасөз мәслихаты өтті. Рахман Зиядаұлы мекеменің 2024 жылы атқарған жұмыстары, 2025 жылға арналған жоспары туралы баяндады.
Жалпы Жоғарғы спорт шеберлігі мектебінің негізгі мақсаты – белгіленген спорт түрлері бойынша Қазақстан Республикасының ұлттық құрама командаларының негізгі құрамына спортшыларды іріктеу және дайындау. Сондай-ақ спортшылардың жарыстарға қатысуын қамтамасыз етіп, олардың сәтті өнер көрсетуіне жағдай жасау, дайындық процесін материалдық-техникалық, әдістемелік және медико-биологиялық тұрғыдан қолдау да маңызды міндеттердің қатарында. Осы мақсатта оқу-жаттығу сабақтары спорттық-сауықтыру лагерьлері, оқу-жаттығу жиындары және спорттық жарыстарды қамтитын 52 аптаға жоспарланған бағдарламалар негізінде өткізіледі.
Рахмет Зиядаұлының айтуынша, алдағы басты міндет – 2025 жылы жас ерекшеліктеріне қарай әлем және Азия чемпионаттарына дайындалу, сондай-ақ 2026 жылы Жапонияда өтетін Жазғы Азия ойындары мен Лос-Анджелесте жалауын желбірететін Жазғы Олимпиадаға іріктелетін спортшыларды даярлау.
Бүгінгі таңда Жоғарғы спорт шеберлігі мектебінде спорт түрлеріне қарай 189 (161 негізгі, 28 ауыспалы) спортшы жаттығуда. Барлығы 96 спортшы Қазақстан Республикасының ұлттық құрама командаларының сапына енген.
Мұқағали БАЛТАБАЕВ