Әулиеата өңірі «Әлем жады» тізімін толықтыруға әзір
Ұлттық құрылтайдың төртінші отырысында Мемлекет басшысы Қасым-Жомарт Тоқаев әдеттегідей ел дамуында айтарлықтай маңызы бар мәнді мәселелерге жан-жақты тоқталды. Мәдениет саласы да Президент назарынан тыс қалмады.
«Мәдениет дегеніміз – жай ғана ғимараттар мен мекемелер емес. Бұл – ұлттық сана-сезімді жаһандық ауқымда нығайта түсетін мықты тұғыр.
Біз ЮНЕСКО-мен ынтымақтастық аясында Қазақстанның материалдық және материалдық емес мұраларын халықаралық тізімдерге енгізуге айрықша мән беріп жатырмыз» деген Мемлекет басшысы жаңа заманда біздің алдымызда жаңа міндеттер тұрғанын айтты.
Сондай-ақ Үкімет түрлі ұлттың барша адамзатқа ортақ білім қазынасына қосқан зияткерлік үлесін көрсететін «Әлем жады» тізіміне деректі мұраларымызды енгізу жұмысын жандандыру қажеттігін де тапсырды.
Жалпы Әулиеата өңірінде мыңжылдықтардан сыр шертетін материалдық және материалдық емес мұралар жақсы сақталған. Солардың ішінде Тараз қаласын ерекше атап өтуге болады. Бүгінде көне шаһарда осы мүмкіндікті жақсы пайдаланып, туризмді дамыту бағытында қолға алынып жатқан іс-шаралар баршылық.
Айталық, өткен жылы Тараз қаласында Швейцария, Болгария, Тәжікстан, Ресей Федерациясы, Қырғыз Республикасы, Өзбекстан, Моңғолия, Үндістан секілді шетмемлекеттерден келген 200-ден астам шебердің тәжірибе алмасып, туындыларын жергілікті жұрттың назарына ұсынуға мүмкіндік берген «Тараз – қолөнершілер қаласы» атты III халықаралық көрме өтті. Тараздық қолөнер және қолданбалы өнер орталығының шеберлері Өзбекстан Республикасының Қоқан қаласында ұйымдастырылған Халықаралық халықтық қолданбалы шығармашылық фестиваліне қатысып қайтты. Жуырда ғана Индонезия мемлекетінде өткен «INACRAFT-2025» халықаралық көрмесінде жамбылдық қолөнер шеберлері көздің жауын алатын туындыларын көпшілік назарына ұсынып ғана қоймай, төл мәдениетіміздің дамуына да зор үлес қосты. Төрт күнге жалғасқан халықаралық көрмеге Орта Азия, Оңтүстік Азия елдерінің және Дүниежүзілік қолөнершілер тізіміне енген қалалардың қолөнершілері қатысқан. Сонымен қатар биыл Тараз қаласында «Достастық жәрмеңкесін» өткізу жоспарланып отыр екен. Айтулы іс-шараға 15 мемлекеттен туристер келеді деп күтіліп отыр.
Айта берсек, облысымызда жұртшылықтың санасын сергітіп, рухани көкжиегін кеңейту бағытында атқарылып жатқан жұмыстар баршылық. «Көне Тараз», «Тектұрмас» кешендері де төл тарихымыздың ұмыт болмай, мәдениетіміздің заман көшімен жаңғырып отыруына айтарлықтай үлес қосып отыр.
Дегенмен Қасым-Жомарт Кемелұлы бүгінгі таңда жасанды интеллекттің ықпалымен түбегейлі өзгере бастаған мәдениет және идеология саласында аталған ақпараттық технологияға тым жақындап кетуге де болмайтынын ескертті. Яғни бұл салада адам факторы әлі де маңыздылығын жоғалтпағаны рас.
Ахметжан ӨЗБЕКОВ,
облыстық айтыскер ақындар,
жыршы-термешілер орталығының директоры