«Мобильді кітапхананың» берері мол
Облыстық көзі көрмейтін және әлсіз көретін азаматтар кітапханасы облыс әкімі Ербол Қарашөкеевтің бастамасымен қолға алынған «Әулиеата – кітап оқитын өңір» жобасы аясында заманауи технологияларды пайдалана отырып, зағип жандарға электрондық кітапханаларға қолжетімділікті арттыруды қолға алды. Осы орайда оқырмандарға «Мобильді кітапхана» тақтасын «Болашақ» арнайы мектеп-интернатында орнатты.
«Кітапхана сіздің телефоныңызда немесе планшетіңізде!» ұранын ұстанатын арнайы кітапхана ұжымы жас деңгейіне қарай 50 атау түрінен қойылған мобильді кітап жасақтады. Қазақ және орыс тіліндегі шығармалар жинағы кітапхананың арнайы аудиостудиясында жазылып, мобильді тақтаға QR-кодтар арқылы еңгізілді.
«Мобильді кітапхана» – кез келген шығарманы аудио нұсқада толық тыңдап шығуға мүмкіндік береді. Оның үстіне жастарға кітап арқылы ойлау, сонымен қатар бос уақыттарын мазмұнды өткізуге жаңашылдық көзқарас қалыптастыруды үйретеді.
Іс-шара барысында облыстық көзі көрмейтін және әлсіз көретін азаматтар кітапханасының директоры Жанна Алшынбаева жоба туралы ақпарат беріп, оның мүмкіндіктерін таныстырды.
Құралай СЕЙСЕНБЕКҚЫЗЫ