Мәдени байланыстар дәріптелді
Ш.Уәлиханов атындағы облыстық ғылыми-әмбебап кітапханасында «Елдің күштілігі – халықтың бірлігінде» тақырыбында мәдени іс-шара өтті.
Жиын барысында өзбек халқының бай мәдениеті, дәстүрлері мен ұлттық мерекелері дәріптелді. Өзбек халқында да «Навруз байрами» ерекше маңызға ие. Бұл күні таң атқаннан бастап керней мен сырнай, дойра мен ногор аспаптарының үні естіліп, халықты мерекелік көңіл күйге бөлейді. Көпшілік бір-біріне қонаққа барып, қарт көршілер мен туыстардың хал-жағдайын сұрап, ағаш отырғызу, сыйлық жасау сияқты игі дәстүрлерді орындайды. Осы игі дәстүрлерді кітапхана қонақтары да оқырмандарға таныстырып, өз әсерлерімен бөлісті.
Кеш барысында қазақ және өзбек халықтарының достығы, мәдени байланыстары жөнінде сөз қозғалып, халықтар арасындағы бауырмалдық пен татулықтың маңыздылығы атап өтілді. Ұйымдастырушылар мұндай шаралардың ұлтаралық келісім мен сыйластықты нығайтудағы рөлі ерекше екенін тілге тиек етті.
Іс-шараға «Тараз қалалық өзбек орталығы» қоғамдық бірлестігінің төрағасы Абдурахман Зайнутдинов шақырылды. Сонымен қатар №4 мектептің мұғалімі Дильфуза Джолдашева, «Шабыт» өнер академиясының бишілері, Жамбыл жоғары медициналық колледжінің студенттері қатысты.
Әлия ЖАНӘБІЛ,
М.Х.Дулати атындағы Тараз
универститетінің 4-курс студенті