Ұрпақ тәрбиесінің негізі
Қазақ халқының бай мәдениеті мен салт-дәстүрлері – ұрпақ тәрбиесінің негізі. Көздің қарашығындай сақтауға тиіс құндылықтарымызды дәріптеу мақсатында Тараз қаласындағы Д.А.Қонаев атындағы облыстық балалар мен жасөспірімдер кітапханасында «Зере» әжелер клубының ұйымдастыруымен «Салт дәстүр – тәрбие негізі» тақырыбында іс-шара өтті.
Жиын барысында «Келін шай» дәстүрі сахналанып, қазақ отбасының үлкенді сыйлау, кішіге ізет көрсету әдебі көрініс тапты. Жас келіннің үлкендерге иіліп сәлем беруі, шай құю рәсімі, дастарқан басындағы сыйластық – барлығы да халқымыздың тәрбиелік дәстүрлерінің айқын көрінісі.
Сонымен қатар іс-шараға қатысушылар шайдың тарихына тоқталып, оның қазақ мәдениетіндегі орны туралы қызықты мағлұматтар алды. Көпшілік үшін шай – жай ғана сусын емес, қазақы қонақжайлылықтың, сыйластықтың белгісі.
Бұл өнегелі сағат көпшілікке рухани әсер қалдырып, дәстүріміздің маңызын тереңірек түсінуге мүмкіндік берді. Ұлттық құндылықтарды дәріптеу – әрбір азаматтың парызы, ал осындай шаралар қазақтың бай мұрасын болашақ ұрпаққа жеткізудің жарқын үлгісі.
Ақжүніс НАҚЫПЖАНҚЫЗЫ,
М.Х.Дулати атындағы Тараз
университетінің 4-курс студенті