Биыл алғашқы қазақстандық теледидар нарыққа шығады
Премьер-Министрдің бірінші орынбасары Роман Скляр мен Samsung Electronics Central Eurasia компаниясының президенті Юджин Джонгтің кездесуінде маңызды мәселелер талқыланды,деп хабарлайды arainfo.kz
Кездесу барысында Роман Скляр жергілікті өндірушілерді жаһандық жеткізу тізбегіне қосу, өндірістің өсімін қамтамасыз ету, оқшаулауды тереңдету және шығарылатын өнім номенклатурасын кеңейту қажеттілігін атап өтті.
Бұл шаралар Қазақстанның экономикалық дамуында маңызды рөл атқарады.Нәтижесінде Samsung Electronics Central Eurasia мен Silkroad Electronics зауыты арасында маңызды келісімге қол қойылды. Аталған келісім шеңберінде 2025 жылдың екінші тоқсанында Қазақстанда Samsung компаниясының алғашқы теледидарлары сатылымға шығады. Бұл жобаның отандық машина жасау саласына қосымша мүмкіндіктер ашып, жоғары білікті жаңа жұмыс орындарын құруға септігін тигізетіні атап өтілді.
Сонымен қатар тұрмыстық техника өндірісін дамыту және екі тарап арасындағы кооперациялық байланыстарды нығайту мәселелері де қаралды. Бұл қадам Қазақстанның өнеркәсіптік әлеуетін арттыруға және жаңа технологияларды енгізуге бағытталған.