Қазақстандық спортшылардың қарқыны қуантады

Байрақты бәсекеде ел қоржынына алғашқы алтын медальді фристайлшы Анастасия Городко салды. Фристайл-могулдан отандасымыз қарсылас шақ келтірмеді. Финалға бірінші орынмен шыққан А.Городко ең жоғары ұпаймен (79,79) жеңіс тұғырына көтерілді.

Екінші алтын жүлдені де Анастасия сыйлады. Жұптық фристайл-могул сайысында ел намысын Анастасия Городко мен Аяулым Әміренова қорғады. Нәтижесінде Анастасия үздік шықса, Аяулым Әміренова күміс жүлдегер атанды.

Сол секілді отандасымыз Никита Акимов үшінші алтын медальға қол жеткізді. Биатлоннан ерлер арасындағы 10 шақырым қашықтықта Мирас университетінің студенті Никита Акимов тамаша өнер көрсетті.

Тағы бір спортшымыз Денис Зинов Универсиада ойындарында бір емес, екі күміс жүлденің иегері атанды. Спорт және туризм академиясының студенті пара шаңғы бойынша жеке спринтте және 10 шақырымға жүгіруде алдына жан салмады. Көп ұзамай тағы бір үмітіміз Антон Бондарев қуанышымызды еселеді. Фристайл-могулдан сынға түскен Антон финалдық бәсекеде жапониялық спортшыға есе жіберіп, дуы басым доданың күмісін қанағат тұтты.

Ал Роман Құрбанов 1 400 метр қашықтықта және жарыстың екінші күнінде 10 шақырымдық еркін стильдегі пара шаңғы жарысында үздік үштікті түйіндеді. Қола жүлдегерлер арасында биатлоншы Арина Крюкова да бар. Арина биатлоннан 7,5 шақырым қашықтықтағы спринт сайысында мәреге үшінші болып келді. Мақтанышымыз Софья Самоделкина болса, мәнерлеп сырғанаудан қола жүлдегер атанып, ел қоржынын тағы бір медальмен толықтырды.

Осылайша қазақстандық спортшылар қазірге дейін 3 алтын, 4 күміс, 3 қола медаль алды.

Сондай-ақ қысқы Универсиадада шайбалы хоккейден Қазақстан ерлер құрамасы күтпеген жерден жеңіліске ұшырады. Хоккейшілер ширек финалда Словакия құрамасынан ұтылды. Енді Қазақстан құрамасы қайталау турнирінде өнер көрсететін болады.

«AR-AI»-ақпарат