Балалар гинекологі неге аз?
Қыз балаларда туғаннан бастап кейбір гинекологиялық аурулар жасырын өтуі мүмкін. Ал уақытында дәрігерге қаралмау аурулардың одан әрі асқынуына әкеліп соғады. Сонымен қатар кей жағдайларда бүлдіршіндер жарақат алса немесе зорлық-зомбылыққа ұшыраса, ең алдымен балалар гинекологінің көмегі қажет болады. Өкінішке қарай, бүгінде елімізде балалар гинекологі тапшы мамандар қатарында.
11 жылдық тәжірибесі бар акушер-гинеколог Динара Орақбаева да біз көтеріп отырған мәселенің өзектілігін айтып, жұмыс барысында орын алған оқиғамен бөлісті. Кешкі кезекшілік кезінде дәрігерге анасы 6 жасар қызын алып келеді. Анасының айтуынша, қызының төменгі жағынан тоқтаусыз қан кеткен. Бүлдіршін күндіз велосипед теуіп, ағасымен ойнаған, ал анасы жұмыста болған. Бұл оқиға жайлы дәрігер өзінің «Instagram» әлеуметтік желісіндегі парақшасында да жазды.
Дәрігер пікірі балалар гинекологтарының тапшылығын және дер кезінде медициналық көмек көрсетудің маңыздылығын тағы да айқындай түсті.
Ал балалар гинекологі Әсел Қанатқызының айтуынша, облысымызда 4 балалар гинекологі бар екен.
Мамандар айтқандай, қыз баланың санасына ерте бастан жыныстық тәрбиені сіңірсек, көп жамандықтың алдын алатын едік. Сондай-ақ балалар гинекологі «аналық бездің кистасы» жас талғамайтынын айтты. Киста жұмыртқа безінен пайда болады. Егер өсіп, таралса, соңы қатерлі ісікке айналады. Сол себепті де қыз балалардың ай сайынғы циклін қадағалау қажет екен.
Айта кетейік, балалар гинекологі тек жыныс мүшелерін ғана емес, сонымен қатар сүт бездерін де тексереді. Қыздың эндокриндік жүйесінің күйін, шаш өсуін бағалайды. Мұның барлығы жыныстық жетілудің бұзылуын болдырмау үшін өте маңызды.
Осы орайда көтеріп отырған мәселемізге байланысты жұртшылықтың да пікірін білген едік. Тараз қаласының тұрғыны, 5 қыздың анасы Маржан Қанатқызы 7-8-сыныптағы қыздарын міндетті түрде балалар гинекологіне тексертіп тұратынын айтты.
Қыз балаға анасы сұлулықтың да, нәзіктіктің де алғашқы эталоны. Сондықтан да қыздың арын, ертеңін, болашағын ойласақ, қазірден мамандарға көрсетіп, қажетті ем-домын алған дұрыс. Сондай-ақ мамандар кішкентай бүлдіршін анемиямен ауыратын болса, шұғыл түрде қазірден ем-шара жүргізу керек екенін айтады. Өйткені қыз бала – болашақ ана, ұлттың ұяты, намысы.
Эльмира БАЙНАЗАРОВА