Үлгілі жеткіншек үйден қашпайды
Жыл басынан бері облыста кәмелетке толмаған жасөспірімдердің үйден кетуінің 242 дерегі тіркелді.
Статистикалық талдау нәтижелері көрсеткендей, жасөспірімдердің өз бетінше үйден кетуінің негізгі себептері – отбасындағы жанжал, ата-аналардың жұмысбастылығы.
Мәселен, 17 жастағы жасөспірім шкафтағы заттарды ақтарып жатқанында әжесінің жасырған ақшасын тауып алады. Ойламаған жерден олжаға кенелген бала тауып алған ақшасына ұялы телефон сатып алған. Кейін әжесі жинап жүрген ақшасына немересінің ұялы телефон алғанын білген соң ұрсады. Осы жағдайдан кейін әжесіне ренжіген немересі үйден жасырын кетіп қалады. Полиция жасөспірімді ертеңіне таңертең үйден 35 шақырым жерден тапқан.
Ал 13 жасар бала ата-анасымен сабақтан төмен баға алғаны үшін ұрсысып, ешбір ескертпестен досының үйіне қонады.
Осыған қатысты ата-аналармен және кәмелетке толмаған жасөспірімдермен профилактикалық әңгімелер өткізілді.
Қазіргі таңда үйден кеткен барлық жасөспірімдер табылды. Балаларға қатысты немесе олардың қатысуымен жасалған қандай да бір қылмыс жасау фактілері оларды іздестіру кезеңінде тіркелмеген. Барлық балаларды іздеуге тек полиция қызметкерлері ғана емес, еріктілер мен белсенді азаматтар да қатысты.
Облыстық полиция департаментінің баспасөз қызметі