Білікті кадрлар дайындауға көңіл бөлінуде
Облыс әкімі Ербол Қарашөкеев Д.И.Менделеев атындағы Ресей химия-технологиялық университетінің (РХТУ) делегациясымен кездесті. Басқосуға басқарма басшылары, М.Х.Дулати атындағы Тараз өңірлік университеті мен «Қазфосфат» жауапкершілігі шектеулі серіктестігінің өкілдері қатысты.
Еске сала кетейік, Мемлекет басшысының тапсырмасына сәйкес М.Х.Дулати атындағы Тараз өңірлік университетінің базасында Д.И.Менделеев атындағы Ресей химия-технологиялық университетінің филиалын ашу көзделген. Бұл бойынша Д.И.Менделеев атындағы РХТУ, М.Х.Дулати атындағы Тараз өңірлік университеті және «Қазфосфат» ЖШС арасында кадрларды бірлесіп даярлау туралы үшжақты келісімге қол қойылған болатын.Қазіргі таңда ресейлік университеттің филиалы орналасатын ғимаратқа жөндеу жұмыстары басталды.
Оқу орнында 55 аудитория бар, оның ішінде 7 лаборатория қарастырылған. Оқу корпусы білім беруге қажетті барлық құрал-жабдықтармен қамтылады. Жалпы бұл жұмыстар тамыз айының соңына дейін аяқталады.Ербол Қарашөкеев химия өнеркәсібі қарқынды дамып келе жатқанына тоқталып, салаға қажетті кадрларды даярлау мәселесіне көңіл бөлді. Сондай-ақ өңірдің әлеуеті мен мол мүмкіндіктерін кеңінен тарқатып айтып берді.
Д.И.Менделеев атындағы Ресей химия-технологиялық университеті жамбылдық студенттерге білім беруді бастап кетті. Өткен жылы «Қос дипломды» білім беру бағдарламасы бойынша 7 студент Мәскеуде білімін шыңдап, оқуын сәтті аяқтады. Сонымен бірге «Қазфосфат» ЖШС-ның қызметкерлері де университет базасында білімдерін жетілдіруде.Биыл қыркүйекте аталған оқу орнының өңірдегі филиалы 30 студентті қабылдап, химия өнеркәсібінің кадрларын даярлауды бастайды. Алдағы жылдары білім алушылардың саны 300-400-ге жетеді деп күтілуде.
Басқосуда М.Х.Дулати атындағы Тараз өңірлік университетінің ректоры меморандум аясында қолға алынған жұмыстарды баяндады.Сонымен бірге Д.И.Менделеев атындағы РХТУ өңірлік филиалының директоры Ирина Фарафонтова да сөз алып, облыстық әкімдікпен бірлесе білім беру бағдарламаларының ауқымын кеңейтуге мүдделі екенін жеткізді.Айта кетейік, ресейлік университеттің өңірлік филиалында білім алған студенттер инженер-химик, химик-технолог, биотехнолог, зертханашы және зерттеуші мамандықтары бойынша жұмысқа орналаса алады. Бұдан бөлек, ғылыми-зерттеу институттары мен зертханаларда жұмыс істеуіне мүмкіндік бар.
Облыс әкімінің
баспасөз қызметі