Ауданда «Таза Қазақстан» саябағы ашылды
Жаңатас қаласының 55 жылдығына орай 55 тал көшеттері отырғызылды.
Сарысу ауданында «Таза Қазақстан» республикалық экологиялық акциясы белсенді жүргізілуде, деп хабарлайды Arainfo тілшісі.
Бүгін «Таза Қазақстан» акциясы аясында Жаңатас қаласына кіре берістен «Таза Қазақстан» саябағы ашылды.
Саябақтың ашылуына аудан әкімі Сәкен Мамытов, аудандық мәслихаттың төрағасы Шаттық Мұсабеков, аудан ардагерлері, зиялы қауым, қоғамдық ұйым өкілдері, мекеме және кәсіпорын қызметкерлері мен жастар қатысты.
Игілікті шарада аудан әкімі Сәкен Үмбетұлы сөз сөйлеп, Мемлекет басшысы Қасым-Жомарт Тоқаевтың бастамасымен қолға алынып жатқан «Таза Қазақстан» экологиялық акциясы «Өнегелі ұрпақ» апталығымен жалғасып, осы экологиялық науқанның аясында ауданда ауқымды жұмыстардың атқарылып жатқандығына тоқталды. Туған жерді көркейту- көгалдандыру баршамызға ортақ іс, әрі келешек ұрпақтың жарқын болашағы үшін жасалған үлкен қадам екендігін айтып, болашақта жаңа саябақ тұрғындар саялайтын, жастар серуендейтін көрікті орынға айналсын, - деген тілегін білдіріп, жаңа саябақтың ашылуымен құттықтады.
Саябақтың ашылуына және қоршаған ортаның жақсаруына, шырайының әрленуіне, жасы желекке бөленуіне өз үлесін қосуға келген көпшілік жаңа саябаққа тал отырғызу шарасына құлшына кірісіп кетті.
Сондай-ақ, «Өнегелі ұрпақ» апталығының бірінші күнінде жаңа саябаққа Жамбыл облысының 85 жылдығына орай 85 шырша, Жаңатас қаласының 55 жылдығына орай, 55 тал көшеттері отырғызылды.