РЕСПУБЛИКАЛЫҚ КАДР РЕЗЕРВІНЕ 7 КАНДИДАТ ӨТТІ

Жуырда облыс әкімдігі білім басқармасының басшылығы өңірімізден республикалық кадр резервіне алынған педагогтермен кездесті. Кездесу барысында басқарма басшылығы резервтегі мамандармен аталған жоба бойынша пікір алмасып, бүгінде облысымыздағы бірінші басшының лауазымы бос тұрған білім мекемелерімен таныстырды. Сонымен қатар білім мекемелеріндегі бірінші басшының лауазымдық міндеттері мен басшыға артылатын жауапкершілік турасында да сөз болды. Кадр резервіндегі мамандар тарапынан ұсыныстар да айтылды. Айта кетейік, білім берудегі өзгерістің көшбасшыларын іріктеу бес кезең бойынша жүзеге асырылды. Бірінші кезеңде үміткерлер өз құзыреттілігін бағалау үшін тестілеуден өтсе, екінші кезеңде оқуға жіберілді, үшінші кезеңде еліміздің жетекші мектептерінде тағылымдамадан өтті, төртінші кезеңде қорытынды бағалау рәсімі жүргізілді және бесінші кезеңде министрлік жанындағы комиссиямен әңгімелесуден өтті. Барлық бес кезеңнің қорытындысымен республикалық кадр резервіне облысымыздан 7 кандидат өтті. Оқудан, тағылымдамадан және әңгімелесуден өткен үміткерлерге сертификат беріледі. Соның негізінде одан әрі жұмысқа орналасу үшін олар кадр резервіне енгізіледі. Резервтегілер бірінші басшының бос лауазымына конкурстық рәсімдерден өтпей тағайындалады. Атап өтейік, барлық кезеңдерден сәтті өтіп, сертификат алғандарға «Басшы-көшбасшы» біліктілік санаты берілетін болады.