ЕКІ МЕДПУНКТ ПАЙДАЛАНУҒА БЕРІЛДІ

Әлеуметтік нысандардың салтанатты ашылу шарасына аудан әкімі әкімі Баубеков Жорабек Нұрмергенұлы, аудандық мәслихат төрағасы Мұратбек Көкірекбаев, «AMANAT» партиясы аудандық филиалының төрағасы Күлайым Шағатаева, аудандық орталық аурухананың бас дәрігері Мейрамбек Дәрменов және ауыл тұрғындары қатысты. Жорабек Нұрмергенұлы ауыл тұрғындарын қуанышпен құттықтап: "Бұл нысан халықтың талап-тілегі, сұранысына сәйкес салынып отыр. Мемлекет басшысы Қасым-Жомарт Кемелұлы халыққа арнаған Жолдауында азаматтардың мүддесі мен сұранысы Қазақстанның экономикалық даму стратегиясының өзегі, яғни, адамның қажеттілігі әрдайым басты назарда болуы тиіс деп айтқаны бар. Осы ретте, осындай әлеуметтік нысандар салу, әсіресе шалғайдағы ауыл тұрғындары үшін аса қажеттілік болып табылады. Сондықтан, бұл бағыттағы жұмыстар алдағы уақытта жалғасатын болады. Бұл медпункт ауыл азаматтарының қажеттілігін өтеп, тұрғындар игілігі үшін қызмет етеді деп сенемін", – деді. Сонымен қатар, шара барысында тұрғындар ришалықтарын білдіріп, ауыл ақсақалдарының қатысуымен салтанатты түрде лента кесілді. Айта кетейік, аталған нысан «Ауылдық денсаулықты жаңғырту» ұлттық жобасы аясында бой көтерді. 5 келушіге арналған медициналық нысанда 3 азамат жұмыспен қамтылатын болады. Ақкөз қайнар ауылында медпункттің ашылуымен басталған қуаныш Тәтті ауылдық округіне қарасты Тәтті станциясында жалғасты. «Жомарт жүрек» бағдарламасы аясында ауыл азаматы, жеке кәсіпкер Бейсенбек Көкебаевтың демеушілігімен, 5 келушіге арналған медпункт ашылды. Салтанатты лента қию рәсіміне қатысқан аудан әкімі Жорабек Нұрмергенұлы ауыл тұрғындарын қуаныштарымен құттықтап, демеушіге алғыс білдірді. Сондай ақ, аудандық орталық аурухананың бас дәрігері Мейрамбек Дәрменов және ауыл ақсақалдары Серік Ізбасаров пен Доғдырбай Мырзабалиев ізгі тілектерін білдірді. Қазыбек КАМАЛ, «Меркі тынысы»