«Әулиеата» – 13 дүркін чемпион

Облыстың «Әулиеата» коман­дасы көкпардан Қазақстанның 13 дүркін чемпионы атанды. Тараз қаласында ұйым­дас­ты­рыл­ған көкпардан ересектер арасындағы ХХІІ Қазақстан Республикасының чемпионаты өз мәресіне жетті. Чемпионатқа еліміздің 15 өңірі­нен 171 спортшы қатысты. 10 күнге созылған дүбірлі додада облысы­мыз­дың «Әулиеата» көкпар командасы жеңіске жетіп, Қазақстанның 13 дүркін чемпионы атанса, Қостанай облысының командасы күміс медальға қол жеткізді. Түркістан және Қызылорда облыстарының командалары қола медальдің иегерлері атанды. Жеңімпаздар мен жүлдегерлер Қазақстан Республикасының Көкпар федерациясы тағайындаған ақшалай сыйақымен марапатталды. Яғни, 1-орын – 3 000 000, 2-орын – 2 000 000 және 3-орын иегерлері 1 000 000 теңгеге ие болды. Сондай-ақ чемпионат барысында шебер өнер көрсеткен спортшыларға «Үздік ойыншы» (Құрманбек Тұрғанбек – Жамбыл облысы), «Үздік шабуылшы» (Оралхан Сұлтанов – Қостанай облысы), «Үздік қорғаушы» (Балғынбек Медетбек – Қызылорда облысы), «Үздік сәйгүлік» («Нұрқасқа» Түркістан облысы), «Үздік төреші» (Ақылбек Меңдіғалиев – БҚО), «Жеңіске деген ерік-жігері үшін» (Саттархан Полат – Қостанай облысы) сынды жекелей номинациялар бойынша 200 000 теңгеден жүлде, дипломдар мен медальдар табысталды. Сонымен қатар біріншілік бағ­дар­ла­ма­сын­да жекпе-жек аттарының да сайысы ұйымдас­ты­ры­лып, астана­лық «Ақжал» сәйгүлігі чемпион атан­ды. 2-орынды Шымкент қаласы­­ның «Хазбик» атты сәйгүлігі иеленсе, 3-орын түркістан­дық «Қаhарманға» бұйырды. Жекпе-жек аттары сайысы­ның жеңімпазы мен жүл­де­гер­ле­рі­не де ақшалай сыйақы табыс­талды. 1 орын – 1 000 000, 2-орын – 500 000, 3-орын – 300 000, 4,5-орындарға 100 000 теңге берілді. Облыс әкімінің баспасөз қызметі