Баспана ұсыну талабы өзгерді

«10 пайыздан басталатын алғашқы жарна болған жағдайда несиелер жылдық 2 пайыз және 5 пайыз мөлшерлемесімен беріледі. Несие мерзімі 20 жылға дейін болады», деп жазылған тиісті мекеме таратқан хабарламада. Жергілікті атқарушы органдарда баспана алу кезегінде тұрған азаматтардың тиісті санаттары жылдық 2 пайыз мөлшерлемесімен жеңілдетілген несие алуға өтініш бере алады. Бұл санатқа I және II топтағы мүгедектер, мүмкіндігі шектеулі балалары бар немесе оларды тәрбиелеп отырған отбасылар, жетім балалар мен ата-анасының қамқорлығынсыз қалған балалар жатады. Сонымен қатар «Алтын алқа», «Күміс алқамен» марапатталған немесе бұрын «Батыр ана» атағын алған, сондай-ақ I және II дәрежелі «Ана даңқы» ордендерімен марапатталған көпбалалы аналар да осы санаттың қатарында. Қазір осы санаттар бойынша 227 мың қазақстандық баспана кезегінде тұр. Оның ішінде 51 мыңы – І және ІІ топтағы мүгедектер. – Егер мүмкіндігі шектеулі адамның кірісі болмаса немесе жеткіліксіз болса, онда ол қосымша қарыз алушыларды тарта алады. Бұрын бұл мақсатқа тек жақын туыстары – күйеуі немесе әйеліне, сондай-ақ кәмелеттік жасқа толған балаларына ғана кепілгер ретінде қатысуға рұқсат берілетін. І және ІІ топтағы мүгедектігі бар азаматтарды қолдау және олардың баспана мәселесін шешуге көмектесу үшін қосымша қарыз алушылардың тізімі кеңейтілді. Енді олар кепілгер ретінде туған ата-анасын, асырап алған ата-анасын, асырап алған балаларын, бір ата-анадан туған және бір ата-анадан тумаған аға-інілері мен апа-сіңлілерін, сондай-ақ атасы, әжесі, немерелерін тарта алады. Пәтер сатып алу шарты тікелей мемлекеттік бағдарламаға қатысушымен жасалады, – дейді «Отбасы банк» акционерлік қоғамы облыстық филиалының клиенттермен жұмыс бөлімінің басшысы Жұлдыз Мейірманова. Сондай-ақ «Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасы» бойынша кредит алу барысында барлық санат үшін кіріске шектеу қойылмайды. Бұған дейін мемлекеттік бағдарламалар бойынша отбасының әрбір мүшесінің соңғы 6 айдағы табысы ең төменгі күнкөріс деңгейінің үштен бірінен аспауы керек деген талап болатын. Оның сомасы – 125 757 және 150 098 теңге. Мәселен, бұл сома белгіленген нормадан кем дегенде 100 теңгеге асып кетсе, отбасы жеңілдетілген заемнан қағылып, баспана мәселесін шеше алмайтын. Сондай-ақ тұжырымдамаға сәйкес қатысушылар кредиттің ең жоғарғы сомасы бойынша шектелмейтін болады. Бұрын аймаққа байланысты ол 10-18 миллион теңгені құрайтын. Енді кредит сомасы пәтер құнына қарай есептеліп, тұрғын үйдің 1 шаршы метрінің бағасы аясында қалыптасады. Әлеуметтік тұрғын үй 3-4 санатқа сәйкес келіп, пәтердің максималды ауданы 80 шаршы метрден аспайтын болады. Енді мемлекеттік бағдарламаға қатысу туралы өтінімдер «otbasybank.kz» жылжымайтын мүлік порталында жылжымайтын мүлік объектілері аясында қабылданады. Бұл алдағы уақытта Қазақстан бойынша өтінімдерді жалпылама қабылдау болмайды деген сөз. Яғни мемлекеттік бағдарламалардың әлеуетті қатысушылары бұдан былай бірден белгілі бір аймақтағы нақты нысандағы нақты пәтерді таңдап өтінім беретін болады. Мысалы, қазір жылдық 2 пайыз мөлшерлемемен заем алып, азаматтар қоныстана алатын нысандар Шымкент пен Ақтөбе қалаларында дайын. Бұл бірінші кезеңде мемлекеттік бағдарламаға осы екі облыстың тұрғындары ғана өтініш беріп, қатыса алады деген сөз. Қалған өңірлердің тұрғындары жергілікті атқарушы органдар салатын белгілі бір өңірдегі жылжымайтын мүліктің дайын болу уақытына қарай бағдарламаға қатыса алады. Сондықтан бағдарламаға қатысуға ниеттілер банктің сайты мен әлеуметтік желілеріндегі ақпаратты қадағалап отырса, әрине, оның артықшылығы жоқ. Осы тұжырымдама негізінде бағдарламаға қатысушыларды таңдаудың негізгі критерийлері ретінде тұрғын үй кезегіне тұру уақыты мен қабылдану санаты есепке алынады. Яғни үміткерлер арасынан әлеуетті қатысушыларды іріктеу кезінде бірінші кезекте І және ІІ топтағы мүгедектер мен мүмкіндігі шектеулі балаларды тәрбиелеп отырған отбасыларға басымдық беріледі. Жылжымайтын мүлік азамат баспана кезегінде тұрған аймақтан сатып алынуы керек.