Талпынған жетер мұратқа
Талпынған жетер мұратқа
Турасын айтқанда, бос жүрген адамның белгілі бір мамандық бойынша лайықты жұмыс табуы қазір де оңай емес. Себебі қандай да бір мекемеден мамандығы бойынша жұмыс іздеуші орын тапқанымен оны басшылық бірден жұмысқа алмайтыны белгілі. Жұмыс беруші тарап үміткерден түйіндеме сұратып, әңгімелесуден өткізіп, «кейін хабарласамыз» деп басқа біреуді жұмысқа алып жататын жағдайлар да жоқ емес. Жұмыс іздеуші «Enbek.kz» электрондық еңбек биржасы арқылы мекемеге қайырылса да осы мәселені бастан кешуі мүмкін. Мұндайда жұмыс іздеген жұртшылықтың мәселесі көбіне бос жұмыс орындары жәрмеңкесінде сәтті шешіліп жатады. Өйткені мұндай іс-шара жергілікті мансаптық орталық арқылы ұйымдастырылып, жұмыс іздеуші мен жұмыс ұсынған мекеме өкілі көзбе-көз сөйлеседі. Ұсынылған жұмыс, жүктелетін міндет, жасалатын жағдай, еңбекақы жайында ақпарат беріліп, бос жүрген адам өзіне қолайлы деп тапса, қолына жолдама алады. Осындай келелі іс-шара Тараз қаласы бойынша мансаптық орталықтың ұйымдастыруымен өтті. Мақсат – облыс орталығындағы жұмыссыздарды тұрақты жұмысқа орналастыру және жұмыспен қамтудың белсенді шараларына тарту. Жәрмеңкенің негізгі мақсаты – Тараз қаласындағы жұмыссыздар мен бас бостандығынан айыру орындарынан босатылғандарға, пробация қызметінің есебіндегілерге, мүмкіндігі шектеулі жандарға арналған бос жұмыс орындар жәрмеңкесі бойынша тұрақты жұмыс ұсыну, жалпы жұртты жұмыспен қамтудың белсенді шараларына тарту. Жәрмеңкеге қала аумағындағы тұрақты жұмысқа 30 жұмыс берушіден 273 бос жұмыс орны ұсынылды. Іс-шараға Тараз қаласының прокуратурасы, Тараз қаласы №1,2,3 пробация қызметі, Тараз қаласы бойынша мансаптық орталық филиалының басшылары мен қызметкерлері, қала көлеміндегі жұмыссыз жастар, бас бостандығынан айыру орындарынан босатылғандар және пробация қызметінің есебіндегілер, мүмкіндігі шектеулі жандар қатысуда, – дейді Тараз қалалық мансаптық орталық директоры Сәбит Мүсрепов. Бос жұмыс орындары жәрмеңкесінде жұмыс берушілер тарапынан жеке секторлар, оның ішінде өндіріс саласына қатысты жұмыс орындары көптеп ұсынылды. Олардың ішінде ең көп жұмыс орнын «Бином» жауапкершілігі шектеулі серіктестігі ұсынған. Аталған серіктестіктің кадр жөніндегі инспекторы Айжан Сандыбаева жұмысшылар тегін тасымалданып, бір мезгіл ыстық тамақпен қамтылатынын айтады. – Серіктестік құрылыс жұмыстарымен айналысады. Сондықтан жұмысшы мамандығы ауадай қажет. Мәселен, серіктестікке 4 электрик, 8 арматуршы, 10 бетоншы, осыншама монтаждаушы, 6 кафель жапсырушы, 4 стропальші, осыншама сантехник, 2 слесарь және бір-бірден қойма меңгерушісі, панель таситын көлік жүргізушісі, құм жуу операторы мен санаушы керек. Жұмыс уақыты таңертең сағат 09:00-де басталып, 18:00-де аяқталады, жұмыс аптасына бес күн. Жұмысшыларға барлық жағдай жасалған. Жұмысқа тегін қатынап, тегін түскі ас беріледі. Осы еңбек жәрмеңкесінде 3 қара жұмысшы және бір «Миксер» жүк көлігі жүргізушісін тауып, оларды жұмысқа қабылдайтын болдық, – деді Айжан Нұрлыханқызы. Тараз қаласында пробация қызметінің есебінде тұрғандардың бірі – Абдуләзиз Рысбеков. Ол жоғары оқу орнын «Бағдарламашы» мамандығы бойынша бітіріп, еңбек жолын Алматы қаласындағы жеке компанияда бастаған. Одан кейін де мамандығы бойынша еңбек етіп жүріп, жастықпен жаза басқан. Бүгінде пробация қызметінде есепте тұр. – Жасым 28-де, отбасын құрмағанмын. Менің өтелуі тиіс әлі 1 жылдан астам уақытым бар. Үйде болғаныммен құқық қорғау органдары қызметкерлерінің назарындамын. Күнделікті не істеп, не қойып жатқанымыз бақылауда. Осы іс-шараның өтетінін солардан естіп, бос жұмыс орындары жәрмеңкесіне жұмыс іздеп келген едім. Қазір маған «Тараз былғары аяқкиім» кәсіпорнынан келген мамандар жұмыс ұсынды. Айлықақысы 100 мың теңгенің үстінде көрінеді. Үйдегілерге масыл болғанша қайта еңбек етіп, оларға қаржылай көмектессем деген ниетім бар еді, сол орындалғалы тұр. Кім жаза басып, кім жаңылыспайды? Қазақта «Адасқанның айыбы жоқ, қайта үйірін тапқан соң» деген сөз бар. Еңбек етіп, заңнан аттамай қоғамға, мемлекетке пайдамызды тигізсек, ол да бір азаматтықтың белгісі, – деді Абдуләзиз Серікұлы. Жәрмеңкеде жұмыс іздеп жүргендерге Тараз қалалық мансаптық орталық мамандары Қазақстан Республикасының Әлеуметтік кодексін басшылыққа алып және Қазақстан Республикасы Үкіметінің 2021 жылғы 12 қазандағы №728 қаулысындағы «2021-2025 жылдарға арналған кәсіпкерлікті дамыту жөніндегі ұлттық жоба» аясында жұмыспен қамтудың белсенді шаралары бойынша халықтың әлеуметтік жағдайын жақсарту бағытында мемлекет тарапынан жүзеге асырылып жатқан бағдарламаларды түсіндірді. Түсіндіру жұмысы барысында халықтың күнкөріс деңгейін жақсарту, тұрақты жұмысқа немесе халықты жұмыспен қамтудың белсенді шараларына тарту және осы бағытта жұмыссыздық деңгейін төмендету мақсатында бос жұмыс орындары бойынша кеңестер берілді. Сонымен қатар «Алғашқы жұмыс орындары», «Жастар тәжірибесі», ақылы қоғамдық жұмыс, кәсіптік оқыту, «Бастау Бизнес», мемлекеттік қайтарымсыз гранттар алу туралы кеңінен түсіндіру жұмыстары жүргізілді. Сондай-ақ іс-шарада біз ҚР Мемлекеттік қызмет істері агенттігі облыстық департаментінің бас маманы Саят Төлепбергеновпен тілдескенімізде департамент мамандары жұмыс іздеушілер арасында мемлекеттік қызметке орналасу үшін өткізілетін конкурс талаптарын түсіндіруге келгенін сөз етті. Олар оқу орнын мемлекеттік грантпен бітірген алғыр түлектердің мемлекеттік қызметке, оның ішінде қалалық, аудандық деңгейдегі ең төменгі лауазымға қонкурссыз қабылданатыны жөнінде мәліметтер беруде. Бұдан бөлек көпшілікті 1 қыркүйекте елімізде Президенттік жастар кадрлық резервіне кезекті іріктеу басталатынын құлағдар етті. Мұндай мақсатта ұйымдастырылатын іс-шаралар – екі қолға бір күрек іздегендерге жұмысқа орналасуға көмектесудің ең тиімді тәсілінің бірі. Осы жолы бос жұмыс орындары жәрмеңкесіне жұмыс іздеуші ретінде 185 адам қатысып, жұмыс берушілермен сұхбаттасып, 59-ы жұмысқа орналасты. Оның ішінде 37-сі тұрақты жұмысқа, 12-сі «Жастар тәжірибесі» бойынша, жетеуі ақылы қоғамдық жұмысқа, үшеуі «Күміс жас» жобасымен, жалпы 22 адам жұмыспен қамтудың белсенді шараларына тартылды. Нұрым СЫРҒАБАЕВ