Таразда 460 отбасы пәтерлі болды

Салтанатты шараға облыстық мәслихат төрағасы Абдалы Нұралиев, Тараз қаласының әкімі Бақытжан Орынбеков, ардагерлер кеңесінің мүшелері мен зиялы қауым өкілдері қатысты. Абдалы Тоқбергенұлы көпшілікті қуаныштарымен құттықтаса, Бақытжан Орынбеков те ізгі лебізін жеткізіп, бұл бағытта атқарылып жатқан жұмыстарға қысқаша тоқталып өтті. – Соңғы онжылдықтың бедерінде Тараз қаласында жаңа ықшамаудандар бой көтеріп, тұрғын үй саны арта түсті. Жалпы соңғы 4 жыл көлемінде Тараз қаласы бойынша 5 800 пәтер берілсе, мемлекеттік бағдарламалар арқылы 3 844 азамат баспаналы болды. Ал пәтер кезегінде тұрған азаматтар 1 956 пәтерге қол жеткізді. Сондай-ақ осы жылы қала аумағында 42 тұрғын үйдің құрылысы жүріп жатыр, жыл қорытындысымен 2 820 пәтерлі тұрғын үйді пайдалануға беру жоспарланып отыр. Бұл үрдіс алдағы уақытта да үзілмей жалғасын табады, – деген шаһар басшысы «Бақытты отбасы» бағдарламасы арқылы баспанаға қол жеткізген бірқатар қоныстой иелеріне пәтер кілтін табыстады. Келесі кезекте облыстық ардагерлер кеңесінің төрағасы Еркінбек Солтыбаев, «Отбасы банк» АҚ басқарма төрағасының орынбасары Нұрлан Ақшанов ақжарма тілегін жолдады. Жалпы 2019-2022 жылдар аралығында өңірде «Бақытты отбасы» бағдарламасы бойынша 1 154 отбасы жаңа баспанаға ие болған. Сонымен қатар осы жылдың соңына дейін жаңа тұжырымдама бойынша 1 040 пәтерге 16 нысанды іске асыру жоспарланып отыр. Облыс әкімінің баспасөз қызметі