СТУДЕНТТЕР ЖҮЛДЕГЕР АТАНДЫ

Дүбірлі додада еліміздің түкпір-түкпірінен келген колледж студенттері бақ сынап, 16 команда кіл мықтыдан кім мықтыны анықтады. Тартысқа толы болған турнирде Жамбыл облысының намысын қорғаған Жамбыл политехникалық жоғары колледжінің студенттері жүлделі III орынды иеленді. Астана қаласынан жеңіспен оралған баскетболшы студенттерді Жамбыл политехникалық жоғары колледжінің директоры Дүйсенбек Исахметұлы арнайы қабылдап, сый-құрмет көрсетті. Колледж директоры студенттерге оқуда да, спортта да озат болып, әрдайым абырой биігінен түспеулеріне тілектестігін білдірді. Үздіктердің арасынан оза шауып, жүлдегерлер қатарынан көрінген команданы жаттықтырған Бекжан Батырбекұлы мен Руслан Бауыржанның да еңбегі атап өтуге тұрарлықтай. Бұған дейін де талай жарыста жасындай жарқылдап, облысымыздың абыройын асқақтатып жүрген Жамбыл политехникалық жоғары колледжінің спортты серік еткен студенттерін, жаттықтырушыларын жарқын жеңісімен құттықтаймыз.