ҚАЗАҚТАН ШЫҚҚАН ТҰҢҒЫШ ДИПЛОМАТ ӘЙЕЛ

1921 жылы Жамбыл облысының Қордай ауданындағы Қасық ауылында дүниеге келген Балжан Бөлтірікова 1941 жылы Алматыдағы мұғалімдер институтын, 1943 жылы Қазақ педагогикалық институтын тәмамдаған. Көпбалалы отбасында өскен Балжан Бөлтірікқызы өзі де көпбалалы ана болып, перзенттеріне барынша саналы тәлім-тәрбие бере білді. Балжан университетте үздік оқып, сталиндік стипендия иегері атанып, кейін сол жылдары Алматы қаласы, Фрунзе аудандық еңбекшілер депутаттары кеңесіне сайланған. Болашақ жары, композитор Бақытжан Байқадамовпен де сол тұста танысқан. Лепсіге жолдама алған Балжан Бөлтірікова оқу меңгерушісі, кейін №12 мектептің директоры болып тағайындалады. Небәрі 21 жасында директор болып, жауапкершілік жүгін абыроймен көтере білді. Сол қиын жылдары мектептің жөндеу жұмыстарына да атсалысып, отбасын да асырап жан бағуда, сондай-ақ іс-тәжірибе жинақтауда да қарап қалмады. 1949-1955 жылдары Балжан Бөлтірікованың саясатта жасаған алғашқы қадамдары қиын кезеңдермен тұспа-тұс келеді. Осы жылдар аралығында Б.Бөлтірікова Қазақ КСР-нің бастауыш және орта мектеп кәсіподақ қызметкерлері орталық комитетінің төрайымы болып тағайындалады. Ал 1956-1966 жылдары Қазақ КСР-нің Әлеуметтік қорғау министрі болады. Бар-жоғы 34 жасында министр лауазымына тағайындалған Балжан Бөлтірікова өзіне артылған жауапкершілікті сезініп, барынша нәтижелі жұмыс істейді. Бұл ел еңсесін енді тіктеп жатқан соғыстан кейінгі ауыр кезеңдер еді. Оның үстіне министр болғаннан кейін қарапайым халықпен көп жұмыс істеп, олардың бар қажетіне жарап, қолғабыс ету ләзім болды. Министрдің алдына соғыстан кейін жарымжан болған, денсаулығы еңбек етуге жарамайтын, аяқ-қолсыз қалған жандар келіп, жиі көмек сұрайтын. Ол өтінішті жай ғана тыңдап қоймай, мәселесін түбегейлі шешіп беруге тырысатын. Балжан Бөлтірікқызының Әлеуметтік қорғау министрі болған жылдары атқарған еңбегі шаш етектен. Соның дәлелі бүгінгі күнге дейін жұмыс істеп тұрған Алматы қаласындағы протезді-ортопедиялық зауыт. Қарттар үйі, бүгінгі «Ардагер» ғимараты бой көтерді. Қаншама лауазымды қызметте жүрсе де ешқашан дүние-мүлікке қызықпаған министр отбасымен 1964 жылы көпқабатты үйлердің бірінен пәтер алады. Балжан Бөлтірікованың сыртқы істер саласында атқарған қызметі өте жемісті болды. 1966-1971 жылдары Қазақ КСР-нің Министрлер кеңесі төрағасының орынбасары болды. Дәл сол жылы КСРО Жоғарғы Кеңесінің Ұлттар палатасының депутаты болып, одақ көлеміндегі сыртқы саяси мәселелерге қатыса бастады. Кейіннен Сыртқы істер министрі лауазымына тағайындалды. 1999-2002 жылдары ҚР Сыртқы істер министрі болған Ерлан Ыдырысов бірнеше республикалық басылымдарға Балжан Бөлтірікқызының сыртқы саясатта атқарған еңбегі туралы мақалалар жазған. Ол «Балжан есімді дипломат» атты мақаласында «БҰҰ Бас ассамблеясының сессиясында Б.Бөлтірікова әлеуметтік және гуманитарлық мәселелерді шешумен айналысатын кеңестер одағы делегациясының үшінші комитетін басқарды. Адамдармен қарым-қатынас жасай алу қабілеті, талқыланатын мәселелерді жан-жақты білуі қазақстандық дипломатқа келіссөздерді сәтті жүргізіп, маңызды халықаралық мәселелерді шешу барысында КСРО ұстанымының қолдау табуына қол жеткізді» деп жазады. Сол жылы Б.Бөлтірікова кеңес делегациясының мүшесі және жетекшісі ретінде түрлі халықаралық форумдарға қатысып, Жапония, АҚШ, Корея, Швейцария, Чехословакия, Сирия, Цейлон және тағы да басқа көптеген елдерге сапар жасайды. Балжан Бөлтірікқызының жұмысы жоғары бағаланып, КСРО Жоғары Кеңесінің Жарлығымен 1966 жылдың 31 желтоқсанында сыртқы саясат саласындағы жемісті қызметі үшін «Еңбек Қызыл Ту» орденімен марапатталады. Ерлан Ыдырысов өз естеліктерінде Балжан Бөлтірікқызы өмірінің соңына дейін құрметті еңбек демалысында болса да белсенді өмірлік ұстанымы болғанын, жас қазақстандықтарға өз іс-тәжірибесін бөлісіп, ел мен әлемдегі қоғамдық-саяси үрдістерді назардан қалт жібермей бақылағанын жазады. 1971 жылы Қазақ КСР Ағарту министрі лауазымына тағайындалған Балжан Бөлтірікова бұл істе де өзінің табанды шешімдерімен көзге түседі. Бастауыш сыныптарда қазақ мектептерін сақтап қалу туралы ұсынысын Қазақстан Жоғарғы Кеңесінің Төралқасында қорғап, сақтап қалады. Елдің білім саласында елеулі еңбек атқарып, жемісті жұмыс істейді. Білікті маман, әр салада еңбегімен көзге түсіп, таныла білген, өмірде әріптестері айтпақшы, байсалды мінезінен танбаған Балжан Бөлтірікова өмірінің соңына дейін ел мүддесі үшін аянбай қызмет етіп кетті. 1998 жылы өмірден озды. Бүгінде Балжан Бөлтірікқызының ізін жалғап отырған ұрпақтары бар. Екі қыз, екі ұлы да ата-аналарының дара жолын жалғауда. Осылайша қазақтан шыққан тұңғыш дипломат әйел Балжан Бөлтірікованың есімі тарих сахнасында мәңгілікке сақталып қалды. Абылайхан СӘРСЕН, журналист, Жуалы ауданы