ҚЫЗЫЛША ДЕРТІНЕН ҚАЛАЙ САҚТАНУҒА БОЛАДЫ?

Қызылша – өте жылдам таралатын вирусты жұқпалы аурулардың бірі. Бұрын қызылшамен ауырмаған немесе егілмеген адам қызылшамен ауырған адаммен байланысқа түссе, ауырып қалу мүмкіндігі өте жоғары. Қызылша індеті қалай таралады? Алдымен инфекция ауа жолы арқылы беріледі. Вирус сыртқы ортаға сөйлеген кезде түкірікпен, жөтелген, түшкірген кезде бөлінеді. Инфекция көзі – ауру адам. Ол айналадағыларға инкубациялық кезеңнің екінші күні, бөртпелер шыққаннан кейінгі төртінші күнге дейін қауіпті. Ал бесінші күні бөртпелері бар адам ауруды жұқтырмайды деп саналады. Бұл аурумен ауырып, сауыққан адам өмір бойы иммунитетін сақтайды. Қызылшамен ауырған аналардан туған балалар 3 айға дейін бұл ауруға шалдықпайды. Өйткені осы аралықта олардың қанында аналық антиденелер сақталады. Бұл аурумен ауырмаған және егілмеген адамдар қызылшаны жұқтыруға бейім болады және өзінің өмірінде кез келген жаста ауырып қалуы мүмкін. Есте сақтайтын ең маңызды жайт – ауру бөртпе шығудан басталмайды. Ол суық тию белгілерімен басталады. Басты белгілері – дене қызуының 38-40 градусқа көтерілуі, әлсіздік, тәбеттің болмауы, құрғақ жөтел, мұрынның бітуі. Кейінірек конъюктивит (көздің шырышты қабығының қабынуы), сонымен қатар беттің шырышты қабығында (азу тістерінің қарсысында) ұсақ ақ дақтар пайда болады. Аурудың үшінші-бесінші күндері ашық түсті бір-біріне өзара ұқсас дақтар пайда болады. Ең алдымен олар құлақтың артында және маңдайда, содан кейін тез арада бет, мойын, дене және аяқ-қолға таралады. Ұсақ қызғылт дақтар тез арада үлкейіп, формасын өзгертіп, бір-біріне қосылып кетеді. Бөртпелердің қалың шыққан кезеңінен 2-3 күн өткеннен кейін дене қызуы 40,5 градусқа қайта көтерілуі мүмкін. Бөртпелер төртінші-жетінші күнге дейін сақталады. Дақтардың орнында қоңыр пигменттер қалады. Олар 2 аптадан кейін кетіп, тері қайта таза болады. Қызылшаның дамуын байқаған сәтте кешіктірмей дәрігерге қаралу керек. Бұл уақытылы диагноз қойып, ем тағайындау және ұйымдастырылған ұжымда тіркелген жағдайда алдын алу іс-шараларын жүргізу үшін маңызды. Қызылшаның алдын алудың ең тиімді және сенімді әдісі вакцинация болып табылады. Екпе егу – вирусты жасанды жолмен тоқтату. Нәтижесінде ағза өзін қорғайтын иммунитет жасайды. Ең алғашқы вакцинация балаларға 12 айлығында, екіншісі 6 жаста егіледі. Егу тұрақты қорғанысты тудырады. Қызылшаға қарсы қосымша егулер науқаспен қатынаста болған қызылшаға қарсы егулері жоқтарға, эпидемиологиялық көрсеткіші бойынша 30 жасқа дейінгі адамдарға салынады. Айрықша айта кетер жайт, жоспарлы екпеден бас тарту тек өзіңіздің ғана емес, басқа да балалардың өміріне қауіп төндіреді.

Гүлнара ТЕМІРБЕКОВА, Т.Рысқұлов аудандық санитариялық-эпидемиологиялық бақылау басқармасы басшысының орынбасары