ҚҰҚЫҚБҰЗУШЫЛЫҚТЫҢ АЛДЫН АЛУ – жарқын болашақ кепілі

Кеңесте №4 үлгілік базалық бағыты «Сыбайлас жемқорлықтың алдын алу және оған қарсы іс-қимыл» жобаларын іске асыру бойынша атқарылған жұмыстар, жастар арасындағы құқықбұзушылықтың алдын алу мәселелері қаралды. Басқосуда алдымен ҚР Сыбайлас жемқорлыққа қарсы іс-қимыл агенттігінің облыс бойынша департаменті басшысы бірінші орынбасарының уақытша міндетін атқарушы – превенция басқармасының басшысы Дәурен Омаров баяндама жасап, қалыптасып отырған ахуал мен көрсеткіштерге тоқталып өтті. Оның айтуынша, өңірдегі сыбайлас жемқорлық тәуекелдер картасына сәйкес 2 сыбайлас жемқорлыққа қарсы мониторинг пен 2 сыртқы талдау жүргізілген. Ол су бағытында және пайдалы қазбаларды пайдалануға байланысты жер саласы және көгалдандыру бағыттарын қамтыған. Облыс әкімінің тапсырмасына сәйкес бұл жұмыстарға жергілікті атқарушы органдар жұмылдырылды. – Өткен жылғы агенттіктің бағалауына сәйкес өңіріміздің мәдениетті қалыптасыру бағыты бойынша оң нәтиже көрсеткенімен, алайда басқармалардың сыбайлас жемқорлық тәуекелдеріне жүргізген ішкі талдауларының сапасы сын көтермейтіні жасырын емес. Биыл жемқорлыққа қарсы жобалық жұмыстарды іске асыруға қала және аудан әкімдіктері де қосылды, – деді Д.Омаров. Аймақ басшысы мәселенің маңыздылығын атап өтіп, кейбір сұрақтар бойынша бірқатар басқарма басшылары мен қала, аудан әкімдерінен жауаптар алды. Жиында тұрмыстық сыбайластықтың алдын алу, ішкі талдаудың сапасын арттыру, жемқорлыққа қарсы мәдениет қалыптастыру бағытындағы әлеуметтік тапсырыстарды тиімді пайдалану, департамент тарапынан жергілікті атқарушы органдарының қызметкерлері арасында сыбайлас жемқорлық, 4-үлгілік базалық бағыттары бойынша семинарлар, оқу жиындарын жиі өткізу мәселелері талқыланды. Сондай-ақ жастар арасындағы құқықбұзушылықтың алдын алу мәселелері туралы облыстық полиция департаменті бастығының бірінші орынбасары Құрмет Мажикенов, жастар саясаты мәселелері басқармасының басшысы Жомарт Зұлпыхар баяндама жасады. Нұржан Нұржігітов жауаптыларға жастар және оқушылар арасында жан-жақты тәрбиелік, психологиялық жұмыстарды күшейтуді, құқықбұзушылық профилактикасы жөніндегі қалалық, аудандық комиссиялардың қызметін жандандырып, құқықбұзушылықтардың алдын алу бойынша барлық мүдделі органдар бірлесе нақты шаралар қабылдауды тапсырды.

Облыс әкімінің баспасөз қызметі